Veç 110 milionë eurove që shteti shqiptar duhet t’i paguajë biznesmenit italian Françesko Beketi për mbylljen e Agon Channel, miliona të tjera janë paguar për proceset gjyqësore në arbitrazh. Pagesat për studio ligjore përllogariten në 3 milionë euro, ku pjesën më të madhe e përfitoi Sheri Bler, studio ligjore e mikut të Edi Ramës.
Qeveria shqiptare pagoi rreth 3 milionë euro shërbime ligjore për procesin e humbur në arbitrazhin ndërkombëtar me biznesmenin italian, Francesko Beketi.
Edi Rama angazhoi të paktën 4 studio të huaja, si edhe disa ekspertë vendas e të huaj. Një pjesë e tyre u angazhuan për procesin e themelit dhe të tjerat për gjyqin e anulimit të gjobës me vlerë 110 milionë euro.
Në përfundim, ekspertët e huaj dështuan, pasi qeveria e Edi Ramës kishte kryer shkelje flagrante, duke mbyllur në mënyrë arbitrare aktivitetet tregtare të sipërmarrësit italian, ku mbi të gjithë qëndron lufta politike kundër “Agon Channel”.
Studio ligjore “Omnia Strategy” e Sheri Blerit ka marrë rreth 900 mijë euro pagesa nga qeveria, për të mbrojtur Edi Ramën në arbitrazhin ndërkombëtar.
Drejtuesja e studios ligjore është bashkëshortja e ish-kryeministrit britanik, Toni Bler, i cili ka deklaruar se do të ndihmojë falas Shqipërinë në procesin ndërkombëtar për delimitimin e kufirit detar me Greqinë.
Qeveria e Edi Ramës angazhoi gjithashtu edhe studiot ligjore ndërkombëtare, “Foley Hoag”, “Nauta” dhe “Cohen & Gresses”.
Në përfundim, i gjithë mundimi i studiove ligjore rezultoi i pasuksesshëm, pasi Edi Rama dhe bashkëpunëtorët e tij të ngushtë kishin krijuar shumë boshllëqe në sulmin e tyre ndaj “Agon Channel”, një betejë që përfundoi me një gjobë gjigante ndaj shtetit shqiptar.
Në fund të marsit 2023, Gjykata e Arbitrazhit e Bankës Botërore hodhi poshtë ankimin e qeverisë shqiptare, e cila kundërshtonte gjobën në vlerë 110 milionë euro, të vendosur ndaj Shqipërisë në procesin e themelit, i cili përfundoi në vitin 2019.
Tashmë që vendimi i arbitrazhit ndërkombëtar ka marrë formë të prerë, Rama dhe qeveria e tij duhet të shkundin mirë buxhetin dhe të dorëzojnë 110 milionë euro tek Françesko Beketi, por edhe miliona euro të tjera që janë dhënë për studio ligjore e shpenzimet gjyqësore./SYRI/
Discussion about this post