Deputeti demokrat Gazment Bardhi u shpreh pasditen e sotme se nga dosja që SPAK ka dorëzuar në Kuvend, me prova e fakte, lidhur me kërkesën për arrestimin e Arben Ahmetajt, përmenden edhe emra të tyjerë ish-kryetarë bashkie apo deputetësh të Partisë Socialiste.
Bardhi tha se ndër emrat që përmenden nga SPAK janë edhe Ermonela Felaj, Baftjar Zeqo dhe Fadil Nasufi.
“Nga shqyrtimi që kam bërë unë, rezulton se në dosje përmenden po ashtu edhe Ermonela Felaj, Fadil Nasufi, Bajftjar Zeqo, Engjell Agaçi , Damian Gjiknuri”, tha Bardhi.
Nasufi dhe Zeqo kanë qenë kryebashkiakë të Beratit dhe Fierit, por sot janë deputetë të PS-së, ndërsa Felaj është nënkryetare e Kuvendit të Shqipërisë.
Ndërkohë deputeti Ervin Salianji është shprehur se ky rast ka shpërfaqur një rast të madh korrupsioni ku thuajse gjithë qeveria është përfshirë.
Ai pohoi se ndër emrat e përmendur është edhe ai i Damian Gjiknurit, ndërsa shtoi se të përfshirë janë edhe shumë zyrtarë e funksionarë të lartë të mazhorancës dhe qeverisë.
“Personi në hetim nuk është në Shqipëri. Ky rast është një rast që ka shpërfaqur në syrin tonë dhe të publikut një rast të madh korrupsioni ku thuajse gjithë qeveria është përfshirë dhe dhjetëra persona deputetë aktualë të PS, kryetarë bashkie e funksionarë të lartë janë përfshirë po njësoj në korrupsion ,Për këtë arsye Rama dhe kjo mazhorancë duhet të japin dorëheqjen për të shmangur këtë krizë që është krijuar. Është përmendur edhe emri që thoni ju, ashtu si dhjetëra të tjerë që janë edhe kryebashkiakë dhe funksionarë të lartë”, u shpreh ai.
Discussion about this post