Personazhet VIP që ishin strehuar në burgun e Durrësit në pritje të përballjes me drejtësinë apo që janë në fazë gjykimi janë zhvendosur drejt Fierit.
Gjithçka ka lidhje me kushtet e sigurisë, ndërsa Drejtoria e Përgjithshme e Burgjeve ka vlerësuar emrat VIP që ndodheshin prej muajsh në burgun e Durrësit do të qëndrojnë në Fier, atje ku duket se ekziston një siguri më e madhe.
Kështu drejt Fierit janë zhvendosur Safet Gjici, Fredi Beleri, Lefter Alla, Alqi Bllako, Lefter Koka e Vangjush Dako. Sipas raportimeve mësohet se transferimi i të burgosurve VIP është kryer pasi kishte informacione dhe raportime se në Durrës, atyre i ishin krijuar tolerime, që siç duket mund të kenë krijuar pakënaqësi te të burgosur të tjerë.
Zhvendosja e të burgosurve VIP ka ndodhur pak ditë pas ngjarjes së rëndë të ndodhur në burgun e Peqinit, ku i dënuari i përjetshëm Sokol Mjacaj ekzekutoi me armë zjarri një tjetër të dënuar, Arben Lleshin. Prokuroria e Elbasanit po heton jo vetëm shkakun e vrasjes, që dyshohet se ishte një krim i porositur me pagesë, por edhe faktin se si kishte arritur i dënuari të posejdonte një armë zjarri në burg.
Për këtë, 11 zyrtarë të burgut të Peqinit u arrestuan dhe do të qëndrojnë në masën e arrestit me burg, ndërsa një tjetër ndodhet në masën e sigurisë “detyrim paraqitje”.
Discussion about this post