Qeveria ka përgatitur listën e re me emrat e diplomatëve që pret ti caktojë si ambasadorë, ose që janë pjesë e trupit diplomatik dhe kryejnë lëvizje paralele.
Në listën e propozuar nga Ministria e Jashtme dhe që pritet të diskutohen në Komisionin e Politikës së Jashtme në Kuvendin e Shqipërisë përfshihen nga Oljan Kanushi, ish-këshilltar i Kryeministrit Edi Rama, te aktori i njohur Petrit Malaj. Kanushi, i cili u emërua muaj më parë si zv.drejtor i SHISH propozohet si ambasador në Slloveni, ndërsa Malaj në Kosovë.
Aktori i njohur do të zëvendësojë Qemal Minxhozin, ndërsa raportet mes Prishtinës zyrtare dhe Tiranës zyrtare duket se po kalojnë një situatë akulli, ku dy kryeministrat kanë një komunikim të vakët, hera herës duke u përfshirë në debate e akuza të ndërsjellëta, për shkak të ndërhyrjes së Kryeministrit Edi Rama në mënyrën se si Qeveria Kurti po administron situatën në veriun e Kosovës.
Gjithashtu në listë është edhe Sokol Dedja, i cili ka qenë zv.ministër i Jashtëm 3 vite më parë, apo edhe diplomatë karriere që zhvendosen nga një vend në tjetrin.
Kështu Genc Pecani nga ambasador në Cceki propozohet si ambasador në Rusi, ndërsa Bardhyl Canaj nga ambasador në Izrael propozohet ambasador në Serbi.
Një tjetër emër është ai i Qirjako Qirkos që ka shërbyer si ambasador në Britaninë e Madhe dhe tashmë propozohet në të njëjtin funksion por në Hungari. Artur Kuko një tjetër diplomat karriere propozohet për ambasador në Holandë, ndërsa është në të njëjtin funksion në Gjermani. Madje pak kohë më parë mediat njoftonin mbi një përplasje në distancë mes tij dhe Presidentit Begaj
Ndërkohë Entela Gjika, nga drejtoreshë Protokolli e Ministrisë së Jashtme, propozohet si ambasadore e Shqipërisë në Spanjë.
Të gjithë emrat e propozuar pasi të kalojnë në filtrin e Kuvendit, do të duhet të dekretohen nga Presidenti i Republikës. Duket se me ardhjen e Bajram Begajt në funksionin e Kryetarit të Shtetit, Qeveria nuk po humbet kohë në rinovimin e stafit diplomatik, gjë që e kishte bllokuar përsa kohë në krye të shtetit ishte Ilir Meta.
Emrat e propozuar si ambasadorë
Oljan Kanushi Slloveni
Genc Pecani Rusi
Qirjako Qirko Hungari
Artur Kuko Holandë
Inid Milo Bullgari
Ilir Hysa Kuvajt
Sokol Dedja Danimarkë
Entela Gjika Spanjë
Petrit Malaj Kosovë
Bardhyl Canaj Serbi
Albana Dautllari Suedi
Mimoza Halimi Poloni
Discussion about this post