Nxënësit e klasës së parë në Kosovë dhe Shqipëri, nga shtatori do të mësojnë me një Abetare të përbashkët. Kështu u bë e ditur në një konferencë për media të ministres së Arsimit në Kosovë, Arbërie Nagavci, ku u tha se kanë përfunduar të gjitha procedurat lidhur me këtë çështje.
Ajo tha se së bashku me ministren e Arsimit dhe Sportit të Shqipërisë, Evis Kushi do të “përurojnë” Abetaren e përbashkët në shtator.
“Sa i përket Abetares së përbashkët, edhe për këtë kanë përfunduar të gjitha procedurat. Kemi kërkuar nga shtëpia botuese që kopja digjitale të dërgohet në shkolla, në mënyre që mësuesit e klasës së parë të përgatiten dhe të punojnë suksesshëm me këta nxënës. Uroj që mos të kemi probleme serioze dhe më 1 shtator, vogëlushët e klasës së parë, të kenë Abetaren në duart e tyre. Kemi planifikuar dhe ministrja e Arsimit dhe Sportit të Shqipërisë, Evis Kushi ka shprehur gatishmërinë dhe dëshirën që të jetë më 1 shtator këtu, në Kosovë që të përurojmë bashkë këtë abetare”, tha Nagavci.
Discussion about this post