Tre turistët çekë që u bllokuan në një zonë të thepisur mes Valbonës dhe Thethit, janë shpëtuar ditën e sotme, pas dy operacioneve të kryera nga ekuipazhi i helikopterit të Forcës Ajrore EC 135.
Për shkak të terrenit të thepisur dhe mjegullës së zonës, helikopteri nuk mundi të depërtonte.
Shërbimet e Komisariatit të Policisë Tropojë, në bashkëpunim me ekipin e qendrës shëndetësore të fshatit Lekbibaj, kanë ndërhyrë në këmbë për të kontrolluar zonën.
Pas disa orësh kërkimesh intensive në terrenin e thepisur të Valbonës, kanë bërë të mundur gjetjen e turistëve, në vendin e quajtur “Maja e Boshit”.
Punonjësit e Policisë fillimisht i nxorën turistët nga terreni i rrezikshëm ku ishin bllokuar dhe më pas i kanë transportuar të tre shtetasit çek, për rreth 2 orë, deri në Bjeshkët e Vashqefenit, ku ishte e mundur ulja e helikopterit.
Më pas turistët, me ndihmën e helikopterit, janë transportuar në qendrën shëndetësore të fshatit Lekbibaj, ku morën asistencën mjekësore dhe aktualisht ndodhen në gjendje të mirë shëndetësore.
Discussion about this post