Talebanët kanë njoftuar se gratë në Afganistan do të lejohen të studiojnë në universitet vetëm në klasa të ndara sipas gjinisë dhe veshja islame do të jetë e detyrueshme, duke nxitur frikën se një aparteid gjinor do të imponohet në vend nën regjimin e ri.
Sipas Guardian, ministri i arsimit të lartë, Abdul Baqi Haqqani, parashtroi një sërë politikash që do të qeverisin qasjen e grave në arsimin e lartë në Afganistan.
Duke folur në një konferencë për shtyp, Haqqani tha se gratë do të lejoheshin të vazhdonin arsimin e tyre universitar, por do të ishte e detyrueshme të mbanin një hijab. Ishte e paqartë nëse kjo nënkuptonte një shami apo fytyrat e grave do të duhej të mbuloheshin plotësisht.
Ndarja gjinore gjithashtu do të zbatohet në të gjitha universitetet, që do të thotë se burrat dhe gratë do të duhet të mësohen në klasa të veçanta. Studentët femra gjithashtu do të lejohen të mësohen vetëm nga gratë.
Haqqani tha gjithashtu se lëndët që mësohen në universitete do të rishikohen.
“Ne nuk do të lejojmë që djemtë dhe vajzat të studiojnë së bashku. Ne nuk do të lejojmë bashkë-edukim.”– tha Haqqani.
Politikat e reja arsimore shënojnë një largim domethënës nga mënyra se si universitetet funksiononin më parë. Para rënies së Kabulit në duart e talebanëve më 15 gusht, universitetet në të gjithë Afganistanin kishin qenë bashkë-edukative dhe gratë nuk duhej të përputheshin me asnjë kod veshjeje.
Numri i studenteve femra në arsimin e mëtejshëm kishte arritur nivele rekord dhe institucionet si Universiteti Herat dhe Universiteti Ghalib në Kabul kishin më shumë studente femra sesa meshkuj.
