Hergis Jica është emëruar në krye të Drejtorisë së Krimit Kibernetik. Kjo është struktura më e re që i shtohet strukturës së Policisë së Shtetit, ndërsa më parë ka funksionuar si Njësia C kundër krimit kibernetik. Jica ka qenë në krye të kësaj njësie dhe duket se do të vijojë drejtimin edhe me shndërrimin e saj në një drejtori.
Duket se zhvillimet në vitet e fundit me sulme kibernetike kanë detyruar strukturat qendrore që të mendojnë krijimin e një drejtorie më të madhe që do të hetojë pikërisht krimet kibernetike.
Që prej vitit 2021, Shqipëria ka rënë pre e sulmeve kibernetike. Një sulm kibernetik u shënua më 15 korrik të vitit 2022, që bllokoi të gjitha faqet zyrtare shtetërore dhe platformën e shërbimeve online e-Albania.
Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet.
Të dhëna konfidenciale të personave publikë, që nga kreu i SHISH deri tek kryeministri, janë publikuar herë pas herë nga hakerat në faqen “Homeland Justice”.
Discussion about this post