Ditëlindja e Monika Lubonjës ka nxjerrë në pah disa marrëdhënie të reja mes ish-banorëve të shtëpisë më të famshme. Gjatë festës së ditëlindjes që ishte organizuar përveç mungesës së disa personazheve, vëmendjen më të madhe e mori vajza e Monikës, Tea.
Ajo është bërë një emër i njohur për publikun, pasi e ëma e përmendte shumë shpesh brenda “Big Brother Vip”. Por, përveç anës së karakterit, aktorja nuk ka folur asnjëherë për lidhjen e vajzës së saj. Është dashur festa e ditëlindjes për të zbuluar se Tea prej vitesh po jeton një histori dashurie.
Kjo vërtetohet më së miri në bazë të disa fotografive që po qarkullojnë në rrjet, në të cilat Tea duket me të dashurin duke u puthur.
Mësohet se partneri zyrtar i vajzës së aktores quhet Ermir Papadhimitri dhe në Tiranë është mjaft i njohur, si një ndër biznesmenët e ri më të suksesshëm.
Ermiri është inxhinier dhe prej 10 vitesh drejton një kompani dixhitale që merret me zhvillimin e faqeve të internetit, dizajn grafik dhe marketing. Zyrat e kompanisë janë në qendër të Tiranës dhe duket se ky biznes i siguron mundësinë e një jete të mirë partnerit të Teas.
Çifti është së bashku prej shumë vitesh dhe, mesa duket, lidhja e tyre tashmë po jetohet në distancë, pasi prej disa kohësh vajza e aktores është larguar në Gjermani ku jeton dhe punon.
Gjithashtu, bëhet me dije se të dy janë njohur në shkollë dhe për disa kohë kanë ndarë edhe karrierën me njëri-tjetrin përveç jetës personale.
Tashmë edhe pse larg, raporti i tyre nuk është lëkundur, duke na lënë të kuptojmë se kjo lidhje është konsoliduar dhe largësia për ta nuk është një problem. Një tjetër fakt që tregon se kjo lidhje është pranë zyrtarizimit është fakti se Ermiri ka qenë në festën e vjehrrës së tij.
Madje çifti nuk i ka kursyer puthjet pasiononte dhe përqafimet mes të pranishmëve. Prej kohësh familjet e Teas dhe Ermirit janë në dijeni të kësaj lidhjeje dhe e simpatizojnë marrëdhënien e krijuar nga dy të rinjtë.
Së fundmi, kujtojmë se në një intervistë të dhënë Monika e ka përshkruar të bijën si një person shumë strikt dhe e ka pikën e saj të dobët.
“Tea është fati im, është dielli që më ngroh pafund, është një vajzë që ia ka dalë vetë në jetë, që e vogël ka studiuar dhe ka kërkuar shumë nga jeta. Ardhja e saj është fat, të gjithë do të dëshironin ta kishin afër. Pika ime e dobët është dobësia për Tean dhe çdo gjë që ajo kërkon, unë ia plotësoj. Aq të kundërta sa mos e diskutojmë fare si temë. Ajo si ekonomiste, është shumë e kursyer, i diskuton gjërat dhe është më e prerë, më e kontrolluar. Unë nuk bashkohem në këto pika edhe vetë si natyrë, përpos profesionit që kam, nuk i shoh gjërat me imtësi, sepse nuk dalin asnjëherë po i pe me sy kaq strikt”.
Discussion about this post