Vizita e kryeministres italiane Giorgia Meloni në Shqipëri u shoqërua me momente jo fort të këndshme për udhëheqësen e Italisë.
Mëngjesin e kësaj të mërkure, Meloni zbarkoi në Rinas dhe më pas fluturoi me helikopter drejt Lezhës, për të mbërritur në qendrën që së shpejti do të presë refugjatët nga vendet e treta që kapen në ujërat e Mesdheut nga autoritetet italiane.
Vizitën në qendër e zhvilloi bashkë me kryeministrin shqiptar Edi Rama, ndërsa hapja e dyerve të kampit në Gjadër zbuloi se struktura i ngjante një burgu të sigurisë së lartë. Për kryeministrin Edi Rama, në këtë aspekt nuk ka asgjë jashtë normales. “Po të ishte e ndërtuar e njëjta në BE, mund ta gjesh në çdo vend të BE, konsiderohet normal, këtu konsiderohet Guantanamo. Pse për cilën arsye”, tha ai në konferencën e përbashkët për mediat pas vizitës, me kryeministren italiane.
Në fjalimin e Ramës u vu re një retorikë e përsëritur lidhur me detyrimin moral sipas tij, të Shqipërisë ndaj Italisë, apo akuzat ndaj tij dhe qeverisë që drejton në emisionit “Report” në Rai3. Në këtë pikë, i erdhi në ndihmë edhe Meloni, e cila tha se sulmet në të vërtetë ishin për të dhe qeverinë e saj.
Meloni bëri me dije se qendra e emigrantëve në vendin tonë do të jetë funksionale nga 1 Gushti. Teksa bëri një rezyme të kostove nga qeveria italiane, u shpreh se me marrëveshjen me Shqipërinë që siç përllogariti do të shpenzohen 134 milionë në vit. Megjithatë, tha se trajtimi i emigrantëve në Shqipëri do i kushtojë shtetit italian më pak se në Itali. Në vendin fqinjë, Meloni është kritikuar veçanërisht për kostot e projektit, sidomos nga opozita.
Një përfaqësues i opozitës italiane, deputeti Riçardo Magi udhëtoi po ashtu në Lezhë dhe pati edhe një përplasje verbale me Melonin.
“Bëtë viktimat për një orë pa iu përgjigjur asnjë pyetje se si do të funksinojë kjo qendër. Ju po bëni fushatë. Badigardët tuaj s’po më lejojnë e po më dhunojnë. Nëse kjo i ndodh një deputeti, imagjinoni se çfarë mund t’i ndodhë një emigranti”, iu drejtua deputeti-Meolonit, teksa në duar mbante një pankartë, ku shkruhej: “Jo Guantanamos italiane”.
“Europa nuk i donte. Kemi sjellë legjislacioni europian këtu”, iu përgjigj Meloni.
Madje, deputeti i partisë Piu Europa, është gjakosur pas përplasjes me truprojat e kryeministres italiane.
Kritika për marrëveshjen në mënyrë demonstrative shfaqën edhe disa aktivistë, të cilët shpalosën një banderolë nga tarraca e një pallati përballë kampit.
Në banderolë ishte shënuar data e pushtimit të Shqipërisë nga Italia fashiste, ndërsa në sfond dëgjohej një fjalim i Duçes.
Aktivistët u shoqëruan më pas nga policia.
Discussion about this post