Nga dita e sotme do të nisë komunikimi pa roaming në rajonin e Ballkanit Perëndimor.
Përdoruesit e telefonisë celulare në Shqipëri, Kosovë, Mal të Zi, Maqedoni të Veriut, Serbi dhe Bosnje-Hercegovinë do të mund të komunikojnë gjatë udhëtimeve në vendet e tjera, të përfshirë në marrëveshje, pa kosto shtesë dhe me të njëjtat tarifa të planit kombëtar përkatës.
Ish-ministri i Jashtëm Ditmir Bushati nëpërmjet një reagimi në rrjetin social “Twitter” shkruan se ky tashmë është një rezultat i prekshëm për qytetarët.
Sipas tij kjo arritje tregon se bashkëpunimi rajonal sjell të tilla përfitime, kur ka një vullnet politik.
Ky proces nisi në mesin e vitit 2019, me uljen e përshkallëzuar të tarifave roaming, me dy etapa, deri në heqjen e plotë të tyre, duke filluar nga 1 korriku 2021. Heqja e tarifave roaming do të lehtësojë komunikimin në lëvizjet e punës dhe turizmit të shtetasve brenda rajonit.
