Kryeministri në detyrë, Albin Kurti, ka deklaruar se Lëvizja Vetëvendosje nuk ka garanci që me votimin e fshehtë do të sigurojë 61 vota për zgjedhjen e kryetarit të Kuvendit të Kosovës.
Megjithatë, ai thekson se përderisa votimi i hapur nuk dha rezultat, duhet provuar edhe votimi i fshehtë si një mundësi për tejkalimin e ngërçit institucional.
Në emisionin “Këndi i Debatit” në Tëvë1, Kurti tha se mosprovimi i votimit të fshehtë do të ishte gabim dhe dëm, duke u bazuar në aktgjykimin e Gjykatës Kushtetuese të vitit 2014.
“Së pari, garanci nuk ka, nuk dimë me siguri që i kemi 61 vota, por duhet ta bëjmë votimin e hapur dhe nuk është mirë të paragjykojmë. E kërkuam zgjidhjen me votimin e hapur, por nuk u arrit. Le ta kërkojmë zgjidhjen me votimin e fshehtë.
Besoj se është gabim dhe dëm nëse nuk e provojmë, sepse Gjykata Kushtetuese në aktgjykimin e vitit 2014 ka thënë se të gjithë duhet të jenë në sallë, të votojnë për, kundër apo abstenim, dhe se votimi mund të jetë i hapur, i fshehtë apo në mënyra të tjera. Pra, e provuam votimin e hapur, nuk pati sukses, le ta provojmë edhe votimin e fshehtë,” tha Kurti.
Kryetari i Partisë Demokratike të Kosovës, Memli Krasniqi, pas takimit me presidenten e vendit, Vjosa Osmani, ka rikonfirmuar gatishmërinë e partisë që ai drejton për të kontribuar në tejkalimin e bllokadës për konstituimin e Kuvendit.
Ai theksoi se tashmë ekziston një interpretim i qartë kushtetues mbi kompetencat dhe përgjegjësitë e secilit akter institucional, gjë që, sipas tij, duhet të ndihmojë në rikthimin e funksionalitetit demokratik.
“Si PDK, kemi paraqitur qëndrime të qarta dhe propozime konkrete për të rikthyer funksionalitetin institucional dhe respektin ndaj rendit demokratik. Bashkëpunimi dhe kompromisi mbeten parimet tona udhërrëfyese – të konfirmuara qartë edhe në aktgjykimin e fundit të Gjykatës Kushtetuese”, tha Krasniqi.
Kreu i PDK-së u shpreh se konsultimet e fundit duhet të sjellin reflektim dhe të ndihmojnë në tejkalimin e, siç e quajti ai, “kryeneçësisë politike”.
ryetari i LDK-së, Lumir Abdixhiku pas takimit me presidenten Vjosa Osmani ka hedhur akuza ndaj kryeministrit në detyrë dhe liderit të LVV-së, Albin Kurti.
Abdixhiku ka thënë se Kurti nuk po e kupton pragmatizmin politik se nuk është tragjedi të bësh kompromis, por është vlerë normale demokratike.
I pari i LDK-së tha se ka parti që po ia japin atë kompromis, duke thënë se PDK-ja i ka 24 vota për 40 emra të LVV-së për kryeparlamentar.
“Ka parti që po ja japin atë kompromis, e kam thënë edhe herën e kaluar LDK-ja i ka 20 vota kundër për secilin emër, NISMA i ka 3 vota për një emër, PDK-ja i ka 24 vota për 40 emra, AAK-ja i ka 5 vota për tre emra. Pra kompromisi është i mundshëm, zgjedh e merr”, tha Abdixhiku.
gijotina.com/
Discussion about this post