Detaje të reja janë zbardhur nga aksidenti i rëndë i ndodhur mëngjesin e së mërkurës në aksin rrugor Lezhë–Milot, ku një automjet u përplas me një kamion, duke i marrë jetën një shtetasi nga Kosova.
Viktima është identifikuar si Kadri Behluli, nga Suhareka, i cili dyshohet se ka humbur kontrollin e mjetit pasi e ka zënë gjumi në timon, çka ka sjellë përplasjen fatale. Hetimet vijojnë për të përcaktuar me saktësi shkaqet e aksidentit.
Nga ngjarja kanë mbetur të plagosur edhe dy familjarë të tij, motra dhe djali, të cilët po udhëtonin në të njëjtin automjet. Të lënduarit janë transportuar në Spitalin e Traumës në Tiranë, ku po marrin trajtim mjekësor dhe ndodhen jashtë rrezikut për jetën.
Drejtuesi i kamionit është shoqëruar nga policia në Komisariatin e Lezhës, ku po kryhen veprimet procedurale dhe po merret dëshmia e tij lidhur me rrethanat e aksidentit.
Sipas njoftimit zyrtar të policisë, pas përplasjes drejtuesi i automjetit humbi jetën në vendngjarje, ndërsa dy familjarët e tij u dërguan me urgjencë në spital.
Autoritetet po vijojnë hetimet për të zbardhur plotësisht dinamikën e ngjarjes së rëndë që ka tronditur zonën e Lezhës.
gijotina.com/’
Discussion about this post