Zjarri që përfshiu zonën ka shkaktuar dëme të konsiderueshme në bazën materiale të stacionit kryesor të furnizimit me ujë të qytetit të Fierit. Sipas drejtorit të Shoqërisë Rajonale të Ujësjellës-Kanalizimeve Fier, Gentian Alikaj, flakët janë shuar.
Alikaj theksoi se parë për neutralizimin e zjarrit është bërë nga punonjësit e ujësjellësit, pasi në ato momente shërbimet zjarrfikëse ishin të angazhuara kryesisht në mbrojtjen e banesave të rrezikuara.
“Dëme të shumta materiale. E gjithë baza materiale në linjat e furnizimit me ujë, mjetet motorike dhe transformatorët janë jashtë funksionit. Kemi marrë masat për ruajtjen e perimetrit të sigurisë, në mënyrë që të furnizohet pa ndërprerje qyteti i Fierit. Kemi njoftuar zjarrfikësen. Duke qenë se kishte dëme në banesa, kryesisht ishte e udhës që zjarrfikësja të kishte nën mbikëqyrje jetët e njerëzve dhe banesat. Fillimisht ndërhyrja është bërë nga punonjësit e ujësjellësit, më pas ka mbërritur zjarrfikësja. Aktualisht nuk kemi më probleme. Automjetet, një pjesë kanë qenë jashtë përdorimit, një pjesë funksionale. Kemi pasur prioritet furnizimin me ujë dhe jo automjetet. Nuk ndikon në furnizimin me ujë të qytetit”, deklaroi drejtori i UK Fier, Gentian Alikaj.
Banorët e zonës për mediat tregojnë momentet e frikës kur panë zjarrin të përhapej pranë banesave të tyre.
“Si ky zjarr nuk ka rënë asnjëherë më parë. U frikësuam shumë, ishte zjarr i madh”, u shpreh një banor.
Një tjetër banore rrëfeu se zjarri i gjeti të papërgatitur, ndërsa ndodheshin në shtëpi.
“Ne jemi trembur, s’dimë çfarë të bëjmë, po i afrohet banesave. Ishim në shtëpi, po hanim bukë kur dolëm dhe pamë zjarrin”, tha ajo.
Ndërkohë, forcat zjarrfikëse dhe strukturat e Emergjencave Civile vijojnë ndërhyrjen në terren për të vënë flakët nën kontroll dhe për të shmangur rrezikun për banesat dhe banorët e zonës.
Sipas Policisë së Shtetit, vatra e zjarrit ka nisur fillimisht pranë vendit të quajtur “Azotiku”, në fshatin Drizë, dhe më pas është përhapur në Qafën e Koshovicës, duke përfshirë sipërfaqe të pyllëzuara pranë fshatrave Peshtan i Madh, Peshtan i Vogël, Drizë Myrtezaj dhe Plyg.
Për shkak të rrezikut të lartë dhe përhapjes së flakëve, janë evakuuar 11 familje, ndërsa policia dhe shërbimet zjarrfikëse vijojnë monitorimin e zonës për të shmangur rrezikun ndaj banesave të tjera. Policia Rrugore ka bllokuar qarkullimin në segmentin “Qafa e Koshovicës–Cakran” në të dy drejtimet, për të lehtësuar lëvizjen e mjeteve zjarrfikëse dhe forcave të ndërhyrjes në terren.
gijotina.com/
Discussion about this post