Në mbledhjen e sotme në Komisionin e Edukimit dhe Medias u mbajt një minutë heshtje për 46 shqiptarët nga Maqedonia e Veriut që humbën jetën në aksidentin tragjik në Bullgari.
Kjo kërkesë erdhi nga deputetja e PD, Ina Zhupa për të treguar solidaritet, ndërsa i shprehu ngushëllimet familjarëve.
“Në Komisionin e Edukimit dhe Medias mbajtëm 1 minutë heshtje për shqiptarët që humbën jetën në tragjedinë e Bullgarisë. E kërkova ta bëjmë këtë gjest për të treguar solidaritetin e ligjvënësve shqiptarë në një ditë kaq të dhimbshme për bashkëkombasit tanë. Ngushëllime të sinqerta familjarëve, të afërmve të viktimave. Lutje për shpirtrat e tyre”, shprehet Zhupa.
Ndër të tjera, ajo ka kërkuar që në Komision të thirret për dëgjesë ministrja për Rininë dhe Fëmijët, Mora Muzhaqi nisur nga rastet e fundit të vrasjes apo abuzimit me të mitur në vend.
“Gjithashtu duke qenë seancë e miratimit të kalendarit të punës së Komisionit kërkova nisur edhe nga ngjarjet e fundit me fëmijët në Shqipëri, të thirret për dëgjesë sa me shpejt në Komision ministria e Shtetit për Rininë dhe fëmijët, Bora Muzhaqi. Ajo duhet “të gjej kohën” për të ardhur për të sqaruar punën e saj, masat që ka ndërmend të marrë, kompetencat, politikat etj. Këto ngjarjet kanë nevojë për trajtimin edhe institucional dhe kërkimin e ndërmarrjes së politikave apo nismave ligjore që mund të parandalojë apo frenojë sa më shumë këto fenomene të abuzimit me fëmijët, të dhunimit apo deri te vrasjet e tyre si rasti më ekstrem dhe makabër”, tha ajo.
Discussion about this post