Autoritetet spanjolle kanë marrë në pyetje shtetasin italian Marco Romeo, autori i dyshuar i vrasjes së Sibora Gaganit, 22-vjeçares italo-shqiptare e cila u zhduk në 2014-n, pasi u largua nga Roma, aty ku jeton ende e gjithë familja e saj. Trupi i Siborës u gjet më 6 Qershor, i murosur në apartamentin ku ata kishin jetuar në qendër të Torremolinos.
Çështja u rihap dhe kërkimet për Siborën rinisën pas deklaratës spontane të 45-vjeçarit teksa shoqërohej për një vrasje të dytë, atë të 28-vjeçares spanjolle Paula, nëna e djalit të tij.
Ishte vetë Marco Romeo që u tha autoriteteve spanjolle se e kishte vrarë e murosur 22-vjeçaren, 9 vjet më parë. Por sipas asaj që shkruajnë mediat spanjolle, në momentin që u mor në pyetje para gjykatës, ai ka deklaruar se është i pafajshëm.
Deklarata mësohet se ka ndodhur para se të gjendej trupi i murosur. Por me gjetjen e saj tashmë ai përballet me akuzën për vrasje të dyfishtë.
Ndërkohë, nëna e Siborës, Elisabeta Shahini, prej 2 javësh tashmë është ende në pritje të testit të ADN-së. Vonesa në rezultatin e ADN-së që pritet të saktësojë se trupi i murosur i përket të resë shqiptare, raportohet se ka ardhur për shkak të autoriteteve italiane, megjithatë shkaqet nuk janë të qarta.
Discussion about this post