Duke folur për ngjarjen e rëndë që tronditi Fierin, Rama tha para gazetarëve se e kishte pasur të pamundur që të shkruante disa fjalë për ngjarjen mbrëmjen e djeshme, prandaj kishte vendosur të dilte sot në konferencë.
“Kjo është një nga ato ngjarje që të lë pa fjalë, dhe duke shqyrtuar të gjithë rrjedhjen e ngjarjes dhe profilin e autorit , mbetet hija e tmerrshme e asaj që ka ndodhur dhe siç e thashë duhet domosdoshmëria për të reaguar menjëherë në nivelin e drejtësisë, për të vënë pikën e drejtësisë në këtë episod kaq tronditës. Iu shpreh ngushëllimet prindërve, familjes, të afërmve, i vetëdijshëm që fjalët në një rast si ky janë krejt të pafuqishme, por sidoqoftë fjalët mbeten, pjesa tjetër siç e thashë i takon drejtësisë, e cila në këtë rast duhet të jetë domosdoshmërisht e shpejtë dhe në lartësinë e nevojës të të gjithë opinionit publik. E pata të pamundur që të shkruaja një tekst për këtë ngjarje, dhe për këtë arsye mu duk më e udhës që ta bëja bashkë me ju sot, në prag të nisjes së një vizitë zyrtare në Romë”, tha Rama.
I pyetur për rikthimin e dënimit me vdekje, kreu i qeverisë tha se kjo nuk mund të ndodhë, the se rikthimi i këtij dënimi nuk është formula për të parandaluar ngjarje të tilla.
“I kuptoj këto reagime, çështja e dënimit me vdekje është e adresuar kohë më parë, si çështje e civilizimit tonë, nga vendet e BE dhe më gjerë. Në adresimin e kësaj çështje ka pasur një proces të gjatë ku janë hedhur nga vendet e para hapat për dënimin me vdekje, të bazuar në shumë analiza në shumë fakte, që kanë folur qartësisht, jo vetëm në aspektin moral, por dhe të bazuar te të drejtat e njeriut. Dënimi me vdekje nuk e bën të paevitueshme për shoqëritë ngjarje të tilla. Shoqëritë kanë në gjirin e tyre këto që shkojnë deri në ekstrem të asaj që ka mbetur nga kafsha në qënien e njeriut, kështu që rikthimi i dënimit me vdekje nuk është as i mundur dhe as formulë dhe shkop magjik për të parandaluar të tilla ngjarje, siç e the dhe e dimë ndodhin në të gjitha shoqëritë”, u shpreh ai.
Nisur nga ngjarja e rëndë, Rama paralajmëroi një ndryshim të legjislacionit për raste të tilla.
“Në aspektin ligjor Shqipëria për shkak të disa ndërhyrjeve në legjislacion ka masat më të ashpra, çështja është zbatimi i tyre dhe ajo që përbën një fatkeqësi për ne në shumë vite është papërgjegjshmëria e trupave gjykues në raport me individë që kanë kryer krime të tilla. Edhe krime që në mos vrasje, kanë rezultuar në përdhunim apo dhunë, le që janë lënë të lirë apo kanë marrë dënime shumë të ulëta nga sa parashikon ligji dhe pastaj i kanë përsëritur duke shkaktuar plagë krejtësisht të panevojshme. Patjetër që mundësitë për ta rishikuar legjislacioni janë, por është ngritja e trupit gjykues në nivelin e atyre që janë shkruar, të kemi standard demokratike”, deklaroi kreu i qeverisë.
Më herët, Rama i shprehu ngushëllimet familjes, ndërsa për mostrën në fjalë tha se duhet të marrë dënimin me ekstrem.
Discussion about this post