Qeveria e re evropiane është e gatshme të zbatojë reformat, bëri me dije zëvendëskryeministri i Malit të Zi, Dritan Abazovç në një takim të bërë ditën e sotme me të dërguarin special të Bashkimit Evropian për Ballkanin Perëndimor, Miroslav Lajçak, në Turqi.
“Bashkimi Evropian duhet t’i ndihmojë vendet e Ballkanit Perëndimor në rrugën e tyre evropiane sa më shpejt të jetë e mundur, veçanërisht pas ngjarjeve në Ukrainë”, tha ai.
Politikani shqiptar e ka informuar sllovakun rreth procesit të formimit të qeverisë së re pasi ishte mandatuar nga presidenti Milo Gjukanoviq.
Lajçak vuri në dukje se Brukseli ka pritshmëri të mëdha nga qeveria e re dhe se Mali i Zi mund të llogarisë në mbështetjen e tij.
Duke folur për pushtimin e Ukrainës nga Rusia, Abazoviç theksoi se kishte një shkelje brutale të ligjit ndërkombëtar dhe një shkelje e integritetit territorial dhe sovranitetit të shtetit ukrainas.
“Mali i Zi, si një anëtar i ardhshëm, ndjek politikën e jashtme të BE-së dhe i bashkohet masave kufizuese të miratuara nga BE kundër Federatës Ruse. Synimi ynë është, si anëtare e NATO-s, të jemi shembull i paqes dhe stabilitetit në Ballkanin Perëndimor”, theksoi Abazoviç.
Abazoviç ndodhet në Republikën e Turqisë, ku do të marrë pjesë në Forumin Diplomatik të Antalias, i cili mbahet nga 11 deri më 13 mars.
Discussion about this post