Këshilltari për median i presidentes së Kosovës, Bekim Kupina, në një intervistë për Radio Europa e Lirë ka thënë se Kisha Ortodokse Serbe nuk ka hequr dorë nga diskursi i regjimit të Millosheviçit e as nga veprimet luftënxitëse të viteve të 90-ta.
Ngjarja shkaktoi incidente dhe tensione të larta midis malazezëve dhe serbëve në qytetin e Cetinën, gjatë ceremonisë për të shuguruar kreu i Kishës Ortodokse Serbe në Mal të Zi, Joanikije. Cetina është qendra kulturore dhe historike e Malit të Zi dhe simbol i identitetit shpirtëror dhe shtetëror për malazezët, por, në të njëjtën kohë, qyteti është seli e Mitropolisë së Kishës Ortodokse Serbe në Mal të Zi. Gjatë ceremonisë së shugurimit të Joanikijes janë dëgjuar edhe këngë nacionaliste për Kosovën.
Në reagimin e tij, Kupina tha se “këndimi i këngëve me motive nacional-shoviniste, me thirrje të hapur kundrejt Kosovës, është një praktikë e hershme, por që ka marrë fund më 1999”.
“Është paradoksale që në shekullin XXI, Kisha Ortodokse Serbe ende propagandon ide serbomëdha të politikës së vjetër të Beogradit. Republika e Kosovës është shtet i pavarur, i njohur ndërkombëtarisht që e ka ushtrinë e vet dhe institucionet e tjera të sigurisë” – tha mes tjerash Kupina.
Ndaj ngjarjeve në Mal të Zi ka reaguar edhe komuniteti ndërkombëtar, duke bërë thirrje për qetësi dhe përmbajtje.
