Dita e sotme përkon me përfundimin e afatit që ish-kryeministri Sali Berisha i ka vënë kreut të PD-së, Lulzim Basha, për të liruar zyrën e kryetarit, me pretendimin se ai është i shkarkuar në mënyrë legjitime. Avokati Spartak Ngjela është shprehur se kryeministri Rama do të vërtetojë tezën e Berishës, që ai mbështet Bashën, por në fakt sipas tij mbrojtja e vërtetë e kryedemokratit vjen nga Uashingtoni.
“Ramë ziu po lodhet kot që të mbajë Saliun. Rama po nxjerr njerëzit e tij për të shpjeguar forcën e Bashës, sepse do të vërtetojë tezën e Saliut që Basha është me Ramën. (!) Si nuk kuptoi një herë nga politika ky piktor me benevrekë? Po forca e Bashës është te Uashingtoni, ku hyn Saliu këtu”, shkruan Ngjela.
Ngjela shkruan se Rama dhe Berisha janë të frikësuar nga Basha, për shkak të fuqizimit që SHBA po i bëjnë këtij të fundit.
“Të dy janë të trembur nga Basha: edhe Rama edhe Saliu, sepse politika amerikane po kërkon të fuqizojë Bashën. Në fakt, kjo përbën në vetvete fillimin e kohës së re: Shqipëria, pa Ramën dhe pa Saliun” shkruan Ngjela.
Sipas avokatit kjo mbështetje e partnerëve ndërkombëtar ndaj kreut të PD-së do të vijojë në bazë të qartësisë së këtij të fundit për të drejtuar sipas politikave amerikane. Kjo gjë do të duket këtë muaj, thekson ai.
“Por, kjo do të varet nga qartësia e Bashës: A do të dijë Basha të organizohet dhe të drejtojë sipas forcës dhe me forcën e politikës amerikane, e cila po e përkrah. Këtë muaj do të duket”, shkruan ai.
Nga ana tjetër Berisha ka akuzuar vazhdimisht Bashën se është një “kukull” e Ramës, ndërsa ka thirrur dhe një protestë kombëtare në datën 8 janar kundër vendimeve të kryedemokratit në selinë blu.
Discussion about this post