Ngjela dyshues se Kuvendi do lejojë arrestimin e Ahmetajt/ “SPAK do godasë djathtas”

Avokati Spartak Ngjela ka komentuar kërkesën e SPAK drejtuar Kuvendit për arrestimin e Arben Ahmetajt.

Në një intervistë për Euroneës Albania, ai tha se arrestimi i personaliteteve të tilla bëhet që të mos fshihen provat.

Sipas tij, çështjen e Ahmetajt, SPAK duhet ta çojë deri në fund pasi ish-ministri mund të krijojë dyshime në ligj.

“E prisja këtë  nga SPAK. Është person politik, nuk mund të arrestohet ose të dërgohet kërkesa për arrest pa ia aprovuar në mënyrë të veçantë e të drejtpërdrejt pafajësinë.

Flasim këtu për arrestimin. Ky nuk e ka veprën penale të cilësuar. Arrestimi i personaliteteve të tilla bëhet që të  mos fshehen provat, e dyta kjo zvarritje që thoni ju është proceduriale.

SPAK duhet ta çojë deri në fund pasi ai mund të krijojë dyshim në ligj. Nuk mund të përjashtojmë faktin se Koka e Bllako nuk kanë dhënë prova. Hetimi duhet të jetë shkencor. Ahmetaj ishte një nga njerëzit më të preferuar të mazhorancës.

Duhet të votojnë 71 persona në Kuvend që ai të arrestohet. Do të ja japë PS? Rama e ka deklaruar se ne nuk merremi me fajësinë. 71 të PS që janë në Kuvend votojnë në mënyrë të fshehtë. Duhet t’i presim të gjithë rastet që mund të prishet kjo.

SPAK i duheshin vetëm prova absolute. Kemi parasysh një gjë që mazhoranca është e socialistëve dhe që Ahmetaj ka pasur shumë pushtet. Rama tani nuk ka gjë në dorë”, tha ai.

Ngjela  tha se Ahmetaj ka qenë një nga njerëzit me influencues të PS dhe e ka ndihmuar atë të vij në pushtet.

Ngjela u shpreh se SPAK tashmë do kalojë nga e djathta duke lënë të nënkuptohet se do të ketë arrestime dhe nga opozita.

“Mendoj se SPAK tani do fillojë punën djathtas, sepse Rama nuk mund të arrestohet. SPAK e drejton SHBA.  Skema amerikane me SPAK kërkoi dhe kërkon që të shpëtojë Shqipërinë nga krimi i organizuar dhe nga korrupsioni. SPAK deri më tani është marrë me shtresa të ulëta.  Për Ahmetajn do shohim votat në Kuvend, nëse mbrohet në Kuvend, kot sa lodhet SPAK”, tha ai.