Spartak Ngjela u shpreh se deri në mesin e muajit tetor do të ketë goditje të SPAK përsa i takon korrupsionit.
Ngjela duke folur në Breaking tha se deri më tani SPAK ka qenë i përqëndruar në goditjen e krimit të organizuar, ashtu sikundër kanë bërë goditje edhe në ditët e fundit, por do të ketë goditje të korrupsionit.
“Deri më tani kemi goditje majtas nga SPAK, do të shikojmë nëse në ditët dhe javët në vijim do të kemi edhe goditje nga e djathta? Duhet të presim për këto goditje, por ajo që di unë të them është se nuk do të mungojnë goditjet si majtas ashtu edhe djathtas”, tha Ngjela.
Lidhur me ndryshimet në Qeveri, Ngjela tha se asnjë nga ministrat e rinj nuk ka njohje ndërkombëtare, nuk njihet në opinionin publik.
“Edi Rama duhet të largohet, duhet të lejojë Partinë Socialiste të zgjedhë një tjetër Kryeministër, pasi nuk ka çfarë ofron më”, tha Ngjela.
Ndërkohë lidhur me zgjedhjet në Kukës, Ngjela tha se do të fitojë kandidati i PS-së për faktin se kuksianët nuk duan Ilir Metën.
“Lulzim Basha nuk nxorri kandidat në Kukës pasi e di që do të humbte. Berisha është strehuar te partia e Metës dhe ka nxjerrë një kandidat, por kuksianët nuk e duan Metën për arsye që dihen, ndaj dhe zgjedhjet në 24 shtator do të fitohen nga kandidati i PS”, tha Ngjela.
Discussion about this post