Prej mbrëmjes të së premtes autoritetet greke kanë shpallur gjendjen e jashtëzakonshme të mbrojtjes civile për qytetin e Volosit e cila do të zgjasë të paktën një muaj në mënyrë që të trajtohen emergjencat dhe të menaxhohen pasojat e ndotjes detare në Gjirin Pagasitikos.
Organet administrative dhe ato shëndetësore kanë ndaluar banjat për banorët në gjithë gjirin në fjalë si dhe peshkimin, ndërsa specialistët thonë se duhen disa javë që ujërat të pastrohen, por leja për peshkim do të jepet vetëm pas analizave përkatëse.
Ekipet e specializuara për të pastruar gjirin në fjalë nga miliona peshq të ngordhur që u shfaqën javën e fundit vazhdojnë punën me ritme të shpejta.Pjesa më e madhe e tyre janë grumbulluar, ndërsa peshkarexha të tjera më të vogla po përfundojnë procesin . Gjithashtu në grykëderdhjen e lumit Ksiria janë vendosur rrjeta speciale për të mbajtur vëllimin e madh të tyre.
Fatkeqësia ekologjike është një goditje për faunën e zonës, ndërsa dëme ekonomike kolosale ka pësuar gjithë rajoni, bizneset dhe turizmi në Volos. Sipas specialistëve miliona peshq nga liqeni Karla që katërfishoi sipërfaqen e tij pas përmbytjeve të vitit të kaluar kanë ngordhur nga temperaturat e larta gjatë verës dhe mungesa e oksigjenit gjatë përpjekjeve për të kulluar ujërat dhe për të zvogëluar liqenin në fjalë, ndërsa pjesa tjetër nga kontakti me ujin e kripur në Gjirin Pagasitikos.
Problemi më i madh tashmë është pastrimi i ujërave ,dezinfektimi dhe djegia e qindra tonëve peshq të ngordhur të cilët pasi mblidhen në kosha të posaçëm shkojnë drejt njësisë speciale në Larisa.
Katastrofa ekologjike është bërë tashmë çështje gjyqësore me të cilën po merren prokurorët e Gjykatës së Lartë si dhe ata të Volosit të cilët po shqyrtojnë jo vetëm ndotjen detare , por edhe çfarë vendimesh janë marrë nga organet kompetente para kësaj katastrofe.
Discussion about this post