Fermerët në fshatin Mizë të Divjakës, i erdhën në ndihmë biznesmenit Ardian Bakiut për të groposur 4 200 rosa të cilat kishin ngordhur mirëpo pas kontaktit me to, përfunduan në spital. Abcnews raporton se banorët u shtruan në spital pasi shfaqën simptomat temperaturë e lartë dhe këputje në trup.
Bakiu tregon se banorët e fshatit që i erdhën atij në ndihmë përfunduan menjëherë në spital, dhe vetëm një ditë më vonë edhe vetë pronari.
“Më kanë ngordhur 4 200 rosa këtu. Gjithçka nisi në fillim të muajit dhe deri më tani. Thirra disa bashkëfshatarë këtu që të më ndihmonin dhe pas kësaj ata përfunduan në spital me temperaturë të lartë. Edhe unë kam 4-5 ditë me temperaturë që shkon deri në 40 gradë Celsius. Nuk e di çfarë ka ndodhur pasi nuk kanë dalë ende me një përfundim pas marrjes së mostrave nga ferma ime”, shprehet Ardiani.
Ai rrëfeu se gjatë ditës së sotme në fermë kanë shkuar një grup nga Drejtoria e Veterinarisë së Fierit, të cilat kanë vënë të gjithë zonën në karantinë duke bërë ndërkohë edhe zhvarrosjen e shpendëve të ngordhur.
“Erdhën të bëjnë zhvarrosjen ata të drejtorisë së Veterinarisë së Fierit, ndërkohë që nga bashkia me kanë sjellë vetëm një sasi uji pak ditë më parë. Askush tjetër nuk ka ardhur të më ndihmojë. Unë po, të gjithëve me infeksion. Po se çfarë infeksioni është nuk e dimë. Me temperaturë të gjithë. Kaluam 5 ditë temperaturë dhe u rregulluam. Unë jam dita e katërt. Erdhën 19 veta që bënë zhvarrimin e shpendëve në fermën time. Zonën e vunë në karantinë. Duam të na subvencionojë shteti”, është shprehur ai.
Discussion about this post