Policia ka finalizuar sot operacionin “LAST WINTER” në Lazarat, përmes të cilit zbuloi një “shtëpi bari” të ngritur pranë banesës së tij nga një i moshuar. Bëhet me dije se, M. S. 62 vjeç dispononte armë zjarri dhe mjete të teknologjisë së lartë që shërbejnë për kultivimin e bimëve narkotike në ambiente të mbyllura, në këtë kuadër policia i ka vënë prangat të moshuarit, banues në fshatin Lazarat, Gjirokastër.
Gjatë kontrollit të banesës së këtij shtetasi, shërbimet e Policisë kanë gjetur dhe sekuestruar 2 armë zjarri pistoleta, 10 krehra, 157 fishekë dhe pajisje që përdoren për kultivimin e bimëve narkotike në ambiente të mbyllura, si: 26 përforcues energjie elektrike, 2 filtra që shërbejnë për pastrimin e ajrit, 7 tuba që shërbejnë për ventilimin e ajrit, llamba dhe projektorë që shërbejnë për transferim nxehtësie, 4 ngrohëse me gaz dhe pajisje të tjera elektrike.
Gjithashtu, në banesën e këtij shtetasi u konstatua lidhje e paligjshme e energjisë elektrike. Policia e ka shoqëruar menjëherë në komisariat ku do të përballet me akuzat që rëndojnë mbi të.
Discussion about this post