Nikoll Radaçi, shoferi i alkoolizuar i cili shkaktoi aksidentin tragjik në Durrës, ku humbën jetën dy fëmijë dhe një tjetër mbeti i plagosur rëndë është lënë në masën e sigurisë “arrest me burg”.
Avokatja Arta Geca u shpreh se masa ishte ajo që pritej, ndërsa tregoi se Radaçi ishte në gjendje të rënduar psikologjike dhe nuk mbajti qëndrim gjatë seancës.
Në të njëjtën kohë, familja e tij nuk ishte e pranishme dhe nuk ka ndërmarrë asnjë veprim për ta mbështetur në këtë fazë të procesit.
Mësohet se familjarët kanë refuzuar t’i sigurojnë një avokat, çka detyroi gjykatën t’i caktojë mbrojtje ligjore nga shteti.
Ngjarja ndodhi mesditën e 4 majit në lagjen nr. 15, ku tre të mitur po luanin në trotuar. Sipas hetimeve, 57-vjeçari, i cili dyshohet se ishte në gjendje të dehur, humbi kontrollin e automjetit dhe i përplasi ata, duke shkaktuar vdekjen e një 12-vjeçari dhe një 10-vjeçari, ndërsa një 8-vjeçar arriti të mbijetojë me dëmtime të rënda.
Rezulton se drejtuesi i mjetit kishte qenë i denoncuar më parë nga banorët e zonës dhe ishte ndëshkuar disa herë për shkelje të rregullave të qarkullimit rrugor.
Ngjarja ka shkaktuar reagime në opinionin publik dhe debat politik, teksa është kërkuar ashpërsim i masave në Kodin Rrugor për parandalimin e aksidenteve të ngjashme.
Discussion about this post