Banorët e fshatit Mekat të Vlorës kanë folur për vrasjen e dyfishtë të ndodhur mbrëmjen e djeshme në familjen Koreta.
Nipi dyshohet se qëlloi për vdekje xhaxhanë e tij dhe më pas veten, ndërsa banorët e zonës përveç habisë, thonë se 39-vjeçari njihej si një djalë shumë i qetë dhe punëtor.
Një i afërm tregon momentin e parë kur i ka gjetur trupat pa jetë të xhaxhait dhe nipit të tij. Sipas dëshmisë së tij, trupi i të riut është gjendur në distancë, ndërsa në dorë mbante armën e dyshuar të krimit.
“Kur vajtëm ne në orën 18:00, pamë që njëri ishte andej tjetri këtej. Nuk e di kush ka qëlluar, nipi kishte armën në dorë. Ngjarjen e panë xhaxhai i tij me gjithë kryeplakun janë akoma aty. Unë i kam miq dhe nuk ka pasur konflikt, ai ishte djalë shumë i edukuar, po t’i thoje plaç ai thoshte faleminderit”, tha një banor tjetër i fshatit.
Të afërm të viktimave shprehen të habitur për ngjarjen pasi djali konsiderohej si një njeri i qetë.
“I kemi tanët, por nuk kemi dëgjuar fare ca bëhet kështu. Nuk kanë pasur probleme me njëri tjetër, djali ishte shumë i qetë. Burri im i ka njerëz të hallës, na vjen habi nga ju erdhi kjo. Nuk dimë asgjë si ndodhi”, tha një e afërme e viktimës.
“Nuk e dimë të saktë pse ndodhi ngjarja, një djali i vdiq, vetëm çupen kishte. Djali i vdiq në aksident, nuk dihet , në Greqi kanë qenë të gjithë ne nuk dëgjuam asgjë e morëm vesh nga televizori. Ishte djalë shumë i mirë, 39 vjeç”, tha një grua tjetër.
Burime për Gijotina.com shprehen se konflikti ka nisur para 10 vitesh, në momentin kur Genci Koreta së bashku me djalin e xhaxhait (viktimës) kanë jetuar dhe punuar në Greqi.
Në një aksident në punë, djali i Jorgji Kretës ndërron jetë, ndërkohë që pranë tij gjendej Genci Koreta i cili akuzohej nga familja e xhaxhait si përgjegjës për vdekjen e kushëririt të tij. Ngjarja ndikoi tek Genci, i cili kaloi në depresion pas vdekjes së kushëririt.
Konflikti i xhaxhait dhe nipit mund të ketë ndodhur për këtë temë, pasi banorët thonë se Genci nuk e duronte dot kur i përmendej kushëriri.
