Udhëheqësja e rrëzuar e Mianmarit, Aung San Suu Kyi nuk ka qenë në gjendje të paraqitet në një seancë gjyqësore për arsye shëndetësore, ka thënë një anëtar i ekipit të saj ligjor.
Aung San Suu Kyi, 76 vjeç, e cila është arrestuar për akuza të ndryshme që nga përmbysja e saj në një grusht shteti ushtarak më 1 shkurt, nuk kishte koronavirus, por u ndje keq pasi nuk kishte udhëtuar me një makinë për një kohë të gjatë.
Sipas Guardian, fituesja e çmimit Nobel për paqen, ka kaluar rreth gjysmën e tre dekadave të fundit në forma të ndryshme paraburgimi për shkak të luftës së saj kundër diktaturës dhe shëndeti i saj është vëzhguar nga afër.
Komunikimi i vetëm i Aung San Suu Kyi me botën e jashtme ka qenë përmes ekipit të saj ligjor, i cili thotë se qasja e saj tek ajo është e kufizuar dhe monitorohet nga autoritetet.
Ajo po gjykohet në kryeqytetin, Naypyidaw, nën akuzat që përfshijnë importimin dhe posedimin e paligjshëm të radiove walkie-talkie dhe shkeljen e protokolleve të koronavirusit. Ajo është akuzuar për pranimin e ryshfeteve të mëdha dhe për shkelje të paspecifikuara të Aktit të Sekreteve Zyrtare në një rast të veçantë dhe më serioz, i cili dënohet deri në 14 vjet burg. Avokatët e saj hedhin poshtë të gjitha akuzat.
