Kryeministri Edi Rama ka marrë i pari fjalën në mbledhjen e Asamblesë së Partisë Socialiste. Rama e nisi fjalën e tij duke analizuar hap pas hapi betejat e PS, ardhjes në pushtet dhe zgjedhjes së saj për herë të tretë.
“Historia e këtyre zgjedhjeve është e njohur, por ajo që duhet kujtuar dhe që na ktheu pas 8 vitesh dhe 880 peripecish në opozitë, ishte këmbëngulja e madhe për t’ia dalë. Arritëm të ngremë një makineri elektorale të fuqishme, të ndërtojmë një skuadër përfaqësuese, të krijojmë një frymë fituese me vizion për Shqipërinë. Si askush më parë në historinë e zgjedhjeve shqiptare u konfirmuam për të tretën herë radhazi. Kjo është fitorja më e vështirë që kemi arritur. Jemi ne të parët që arrijmë dhe kjo flet vetë. Kjo është fitorja më e vështirë për tu merituar. Fitorja e zgjedhjeve të jep mundësinë për të fituar beteja të vazhdueshme”, tha Rama.
Rama nuk e fshehu ambicien e tij por tha se sfida e radhës është të zgjidhen pas 4 vitesh, të votohen për mandatin e katërt qeverisës. Ai nënvizoi se nuk ka qenë asnjëherë më i trazuar se tani, pas fitores së zgjedhjeve të 25 prillit.
“Herën e katërt do e kemi më të vështirë se këtë të tretën, por nuk e luan topi se detyra jonë për ata që na besuan është se kemi nderin e jashtëzakonshëm të udhëheqim është të bëjmë të pamundurën që të rikonfirmohemi pas 4 vitesh”, tha Rama.
