Sot nis mësimi plotësues në të gjitha shkollat në vend. Nxënësit do t’u rikthehen mësimeve ku kanë hasur vështirësi apo paqartësi gjatë vitit të kaluar, kur procesi mësimor u zhvillua online.
Teksa vijon rritja e numrit të personave të infektuar me covid-19, Instituti i Shëndetit Publik ka publikuar udhëzimin me masat anti-COVID që duhen respektuar. Në zbatim të vendimit të Komitetit Teknik për vaksinimin me detyrim, mësuesit duhet të marrin vaksinën deri më 30 shtator.
Nëse ka mësues që nuk mund të vaksinohet brenda këtij afati, ata duhet të paraqesin një arsyetim nga mjeku tek drejtuesit e tyre. Vaksinimi me detyrim vlen për të gjithë personelin e shkollës. Në të kundërt, po ashtu sikurse mësuesit, edhe ata do të duhet të paraqesin arsyet në rast mosvaksinimi.
Ndërkohë, mes rregullave të tjera të listuara nga ISHP, që duhet të respektohen në shkolla është edhe mbajtja e maskës me detyrim për çdo person gjatë qëndrimit në ambientet e shkollave. Në klasa, nxënësit duhet të qëndrojnë në një distancë 1.5 metra nga njëri-tjetri dhe ambientet duhet të ajrosen vazhdimisht.
Nxënësve të ciklit të ulët u rekomandohet të mbajnë maskë gjatë orarit të mësimit, ndërsa nxënësit e ciklit të lartë duhet të mbajnë maskën në ambiente e brendshme në shkolla. Po ashtu, pavarësisht nëse janë vaksinuar apo jo, mbajtja e maskës në klasa, do të jetë e detyruar edhe për mësuesit.
Në udhëzimin e ISHP thuhet po ashtu se nuk do të lejohet që një nxënës të dalë nga godina dhe të rikthehet përsëri në të, brenda ditës. Do të lejohet vetëm një hyrje dhe një dalje në ndërtesën e shkollës, ndërsa dalja nga ambientet e shkollës do të bëhet sipas rregullave duke ruajtur distancimin social dhe fizik, nën mbikëqyrjen e mësuesve kujdestarë.
Mësimi plotësues do të zgjasë deri më 24 shtator dhe më 27 shtator do të nisë zyrtarisht viti i ri shkollor.
