Nis nesër turneu i veçantë në Luginën e Preshevës, me pjesëmarrjen e mbi 300 fëmijëve nga mosha 7 deri në 13 vjeç. Një turne që për herë të parë financohet i gjithi nga Federata Shqiptare e Futbollit, nga baza materiale, deri tek ushqimet dhe pijet.
Sipas asaj që ka mësuar Gijotina, Federata e Futbollit ka alokuar një fond special që shkon deri në 20 mijë euro. 300 sete uniformash falas, topa, piketa, medalje, kupa që do të dhurohen falas për futbollistët e vegjël të Luginës dhe të diasporës të cilët do të marrin pjesë në turne. Jo vetëm kaq, por FSHF do të mbulojë edhe të gjithë nevojat organizative, ushqimet dhe pijet për të gjithë ditët e këtij turneu.
Një gjest që vlen për t’u duartrokitur dhe që jep mesazhin e bukur që mbështetja e FSHF-së nuk mungon sa herë i jepet mundësia. Turneu nis më 24 korrik dhe mbyllet me 28 korrik. Në ceremoninë mbyllëse do të jetë i pranishëm edhe vetë Presidenti Armand Duka, duke e vlerësuar maksimalisht këtë turne.
Discussion about this post