Kanë nisur sot punimet për ndërtimin e Aeroportit Ndërkombëtar të Vlorës. Të pranishëm në ceremoni janë kryeministri Edi Rama, ministrja Belinda Balluku si dhe ndërtuesi i projektit, politikani kosovar Behgjet Pacolli.
Ky i fundit, u shpreh gjatë fjalës së tij se ky do të jetë një kantier ndërtimi me një vlerë të madhe ekonomike për vendin, ndërsa e konsideroi veprën më të bukur në trojet shqiptare.
“Kam nderin që sot të jem në këtë ditë të veçantë të kombit ku ne festojmë 109-vjetorin e Pavarësisë, dita bëhet më madhështore kur ne me punë praktike fillojmë një kantier aq të rëndësishëm, fillimi i këtij kantieri ka rëndësi për ekonominë e vendit dhe është një projekt i posaçëm pasi tregon qartë harmonizimin dhe bashkëpunimin e qeverisë me privatin. Është një veprim ekonomik, i ekonomisë liberale, ku qeveria krijon kushtet dhe bën çdo gjë që t’i sigurojë investitorit infrastrukturën ligjore dhe fizike, dhe investitori fillon punën e tij të investuarit për të krijuar mundësi për vetveten dhe bashkëudhëtarë tanë. Jam i lumtur që kjo vepër ndodh në vendin tim dhe në qytetin që kam shumë përzemër. Do të jetë aeroporti më i bukur në këto troje”, tha Pacolli.
Nga ana tjetër, ministrja Balluku tha se aeroporti synon të hapet në prill të vitit 2024 dhe të fillojë fluturimet në 2025.
Discussion about this post