Mozaiku i emërtuar “Shqipëria” në fasadën kryesore të godinës së Muzeut Historik Kombëtar po rikonstruktohet.
Drejtori i Muzeut Dorian Koçi njoftoi se punimet janë me kontribut nga BE. “Ka filluar restaurimi i mozaikut të Muzeut Historik Kombëtar, një kontribut i programit “EU for Culture” i Bashkimit Evropian”, u shpreh ai.
Më herët ishte ministrja e Kulturës Elva Margariti, që është shprehur se në fillim të muajit maj do të niste puna për restaurimin e mozaikut.
“Programi EU FOR CULTURE gati për të ngritur kantieret e para. Gjatë takimit të radhës së këshillit drejtues të programit vendosëm për afatet e fillimit të punimeve. Dhe sot kemi një lajm të mirë! Në fillim të muajit maj fillojnë punimet për restaurimin e mozaikut të Muzeut Historik Kombëtar, për të vijuar me restaurimin e kishës së Shën Marisë në Rubik dhe kishës së Shën Ndojit në Kepin e Rodonit”, u shpreh ajo
Mozaiku përurua bashkë me muzeun në vitin 1981 dhe ka një sipërfaqe prej rreth 440 metrash katrorë, me përmasa 40 x 11 metra. Ky mozaik i emërtuar “Shqipëria” është më i madhi i këtij lloji në Shqipëri.
Mozaiku paraqet një skenë masive me luftëtarë, burra e gra, që nga periudha ilire në antikitet me harqe e parzmore, dhe deri në periudhën e luftës për çlirimin e Shqipërisë.
Ky mozaik i vendosur në fasadën e godinës së muzeut përbëhet nga një panel me llaç çimentoje, brenda të cilit është përfshirë një sgarë hekuri. Mbi sgarën e hekurit është vendosur një shtresë e hollë fine po llaç çimentoje, mbi të cilën janë vendosur teserat. Ato janë të prodhuara në mënyrë industriale dhe kanë përmasa rreth 5 x 5 cm.
Tentativa për modifikimin e tij të pjesshëm ka pasur edhe vite më parë, por në tërësinë e tij asnjëherë nuk është ndërhyrë dhe kjo ndodh për të parën herë.
Ky mozaik mbanë firmën dhe autorësinë e artistëve të njohur si Josif Dobroniku, Vilson Kilica, Agim Nebiu, Anastas Kostandini dhe Aleksandër Filipi.
