Seanca e sotme e Kuvendit të Shqipërisë ka nisur me një minutë heshtje në nderim të gjyqtarit të Apelit, Astrit Kalaja, i cili u vra mesditën e së hënës gjatë një seance gjyqësore.
Kreu i Grupit Parlamentar të Partisë së Lirisë, Tedi Blushi, ka kërkuar debat për sigurinë në gjykata, ndërsa në rendin e ditës janë parashikuar raportime të disa institucioneve për veprimtarinë e tyre gjatë vitit 2024, si dhe pyetje dhe debat nga deputetët.
Para seancës, në orën 09:30, është mbledhur Konferenca e Kryetarëve për të përcaktuar kohën e debatit për raportimet e institucioneve. Partia Demokratike ka kërkuar 4 orë debat për çdo raport, ndërsa mazhoranca ka propozuar vetëm 2 orë.
PS nuk pranoi kërkesën e PD-së, por vendosi për një kohë më të gjatë sesa fillimisht kishte propozuar: 2 orë e 30 minuta për çdo raport.
Në fillim të seancës pritet raportimi i veprimtarisë së Autoritetit të Komunikimeve Elektronike dhe Postare (AKEP), pasuar nga leximi dhe votimi i projektrezolutave nga disa komisione parlamentare.
Gjithashtu, do të raportojnë edhe Enti Rregullator i Energjisë (ERE), Enti Rregullator i Ujit (ERRU) dhe Komisioneri për të Drejtën e Informimit dhe Mbrojtjen e të Dhënave Personale (KDIMDP) për vitin 2024.
Discussion about this post