Këtë të diel do të nisë edicioni i 86-të i Kategorisë Superiore, ku do të luhen dy ndeshje paralelisht në të njëjtin orar.
Në orën 20:00 në stadiumin “Elbasan Arena”, Dinamo pret Egnatian kampione në fuqi, në një përballje mes ekipesh të cilat këtë vit kanë si synim jo vetëm kapjen e një vendi në “Final Four”, por edhe titullin kampion.
Rrogozhinasit kanë bërë disa lëvizje në radhët e tyre pasi janë larguar emra të rëndësishëm dhe u duhet pak kohë derisa të futen në shina të rinjtë.
Edhe Dinamo ka bërë disa lëvizje, duke afruar emra të rëndësishëm në radhët e skuadrës së drejtuar nga Dritan Mehmeti dhe pritet me shumë kureshtje të shihet se si do të përballet me një ekip si ai i Egnatias. Ky duel do të transmetohet në RTSH Sport.
Ndërkohë, po në orën 20:00 në stadiumin “Niko Dovana” të Durrësit, Teuta vendase do të presë Bylisin e sapo ngjitur në elitë.
Durrsakët kërkojnë ta nisin me fitore si për të treguar se nuk duan të përjetojnë një tjetër sezon si i kaluari, ku ishin në pjesën më të madhe të kohës në luftën për mbijetesë. Edhe Bylisi kërkon t’i shmanget fundit në këtë sezon të kthimit në elitë, ndaj përballja pritet të jetë shumë e luftuar. Kjo ndeshje do të transmetohet në RTSH2.
Ndërkohë, ditën e nesërme do të luhen edhe tre ndeshjet e tjera të kësaj jave të parë, ku Partizani do të presë Vllazninë, Skënderbeu do të presë Elbasanin dhe Laçi do të luajë kundër Tiranës.
Discussion about this post