Nis sot aplikimi i dozave të treta të vaksinës ndaj Covid-19 për personat mbi 60-vjeç, për të ofruar një mbrojtje më të plotë ndaj virusit. Vaksinimi me dozat e treta do të bëhet kryesisht me të njëjtën vaksinë, por mund të ketë edhe alternime.
Nga sot mund të vaksinohen edhe fëmijët mbi 16 vjeç dhe ata 12-15 vjeç që vuajnë nga sëmundje me ulje të imunitetit, vaksinimi i të cilëve do të bëhet me lejen e prindërve.
Vendimet u bënë publike nga Komiteti Teknik i Ekspertëve në mbledhjen e 22 tetorit, ndërsa propozimi ishte bërë pak ditë më parë nga Komiteti i Imunizimit.
Aplikimi i dozës së tretë të vaksinës dhe vaksinimi i fëmijëve po ndiqen edhe nga shumë vende të tjera të zhvilluara, për të penguar përhapjen e Covid dhe rikthyer sa më shpejt normalitetit.
Ministrja e Shëndetësisë, Ogerta Manastirliu, ka deklaruar se qeveria do të rrisë edhe më tej diponibilitetin e vaksinave, kjo edhe falë aktit normativ që i hap rrugë ardhjes brenda vitit të 500,760 dozave vaksinash.
“Kjo marrëveshje do të rrisë furnizimin me vaksina. Një marrëveshje që realizohet në sajë të bashkëpunimit me Pfizer, pas marrëveshjes së parë ku erdhën 500 mijë vaksina. Vjen ky amendim për 500,760 doza vaksine të cilat priten të lëvrohen brenda muajit dhjetor të këtij viti. Ne jemi në negociata me Pfizer për nënshkrimin e marrëveshjeve për të siguruar vaksina për vitin tjetër dhe në vazhdim për të rritur mbulesën vaksinale dhe për t’iu përgjigjur çdo skenari që Komitetet tona do të vendosin për të siguruar vaksinimin e popullatës”, tha Manastirliu.
Ndërkohë numri total i vaksinimeve të kryera në vend ka shkuar në mbi 1 milion e 900 mijë.
