Edhe pse kanë kaluar disa ditë tashmë, protestat e prindërve dhe nxënësve në fshatin Grizë, bashkia Patos, të qytetit të Fierit, janë ende duke vazhduar.
Bashkia dhe Drejtoria Arsimore e Rajonale e Fierit morën vendimin për të zhvilluar procesin mësimor në shkollën “Hekuran Maneku” në Patos.
Për shkak të këtij vendimi, prindërit e 35 nxënësve në “Shkollës së Bashkuar” në Grizë kanë ngritur zërin, pasi nuk dëshirojnë që t’i dërgojnë fëmijët e tyre në shkollën e Patosit.
Sipas tyre, këto kohë kanë ndodhur shumë aksidente dhe ata nuk ndihen të sigurt për të dërguar fëmijët e tyre në Grizë, pasi nuk do ketë kush të kujdeset për ta në momentin e kthimit për në Patos.
Qytetarët gjithashtu, thanë se për sigurinë e fëmijëve do të ishte më mirë mësimi online, deri sa shkolla të rregullohet, pasi sipas tyre kjo gjë mund të arrihet.
“Ne jemi të vendosur që fëmijët në Patos nuk do t’i çojmë, pranojmë një mësim online deri sa shkolla të rregullohet sepse shkolla nuk është në atë gjendje për t’u prishur. Para dy ditësh nipi i burrit u vra tek PS-ja, është në spital edhe sot. E mori makina përpara, ka thyer këmbën dhe krahun. Kush më garanton mua që fëmijën nga Patosi, do ma sjellin mirë në shtëpi. Nuk jemi të sigurt! Nuk e krahasojmë jetën e fëmijës me këtë mësim që do marrin në shkollë. Të vazhdojë mësimi online deri sa shkolla të rregullohet”- shprehet një banor.
“Është problemi më i madh i joni. Se fëmijët do kalojnë tek ajo rrugë, pasi dje ndodhi, dhe është shumë e freskët, madje nuk ishte fëmijë por ishte 20 vjeç. E mori makina dhe e përplasi matanë. Ky është problem madhorë. Gjysma e shkollës është shumë e rregullt, pa asnjë lloj plasaritje, mund të punohet gjysma e saj ose pranojmë mësimin online. Në asnjë mënyrë që t’i dërgojmë kaq larg dhe me këtë rrezikshmëri. Ne nuk kemi marrë një përgjigje të saktë. Kjo punë ka një muaj që po endet rrugëve. Nuk e di, presim një përgjigje.”- thotë një banor tjetër.
Rikujtojmë se protestat e prindërve kanë nisur si pasojë e mbylljes së shkollës në fshatit Grizë pasi ka pësuar dëmtime nga tërmeti i 2019. Gjithsesi ata besojnë se shkolla nuk ka dëme serioze dhe mund të rregullohet /O.B/ Gijotina.com
