Nisma Thurje ka shpallur sot zyrtarisht mbështetjen për kandidatin e pavarur Florjan Binaj në garën për Bashkinë e Tiranës. Vendimi është marrë nga Kryesia e partisë, e cila ka theksuar se kjo mbështetje vjen si rezultat i vlerave dhe integritetit të dëshmuar nga Binaj ndër vite si aktivist dhe zë i pavarur qytetar.
“Në një qytet ku propaganda ka zëvendësuar të vërtetën, zëri i Florit ka mbetur i pastër dhe i pavarur,” thuhet në deklaratën zyrtare të Nismës Thurje.
Sipas partisë, Florjan Binaj është dalluar për përkushtimin e tij ndaj kauzave qytetare dhe mbrojtjes së të drejtave publike. Ata rikujtojnë protestat për mbrojtjen e Teatrit Kombëtar, lumit Vjosa, kundër rritjes së çmimeve dhe padrejtësive të tjera sociale, ku Binaj ka qenë aktivisht pjesë e tyre.
“Si gazetar, Flori ka treguar guximin për të denoncuar korrupsionin, ka folur hapur, pa filtra,” thuhet në deklaratë, duke nënvizuar se ai përfaqëson një alternativë të pastër dhe të jashtë sistemit.
Nisma Thurje shprehet e bindur se, nëse zgjidhet, Binaj do të sjellë një frymë të re dhe do të punojë për një Tiranë që i përket qytetarëve, jo interesave të një pakice të lidhur me pushtetin.
Në fund të deklaratës, Nisma shpreh gatishmërinë për të bashkëpunuar me Binajn si këshilltarë bashkiakë në drejtim të politikave sociale, si sigurimi i ushqimit në shkolla, përmirësimi i transportit publik dhe rritja e transparencës.
“Tirana ka nevojë për një zë të pavarur, për një kryetar që nuk vjen nga sistemi që e ka rrënuar qytetin” – përfundon deklarata.
Discussion about this post