Nisma Thurje, e cila denoncoi koncesionin e sterilizimit, për të cilën sot u arrestuan ish-zv.ministri i Shëndetësisë, Klodian Rjepaj dhe biznesmeni Ilir Rrapaj ka reaguar duke kërkuar që të arrestohet edhe Ilir Beqaj, apo politikanë të tjerë të nivelit të lartë.
Me anë të një reagimi në Facebook, Nisma Thurje bën thirrje që paratë e këtij koncesioni të konfiskohen dhe t’u kthehen shqiptarëve.
“I inkurajojmë prokurorët e SPAK-ut që të mos kufizohen në nivelin e funksionarëve publik, por të çojnë përpara drejtësisë politikanët e lartë duke nisur që nga ish ministri Ilir Beqaj e deri ku arrin zinxhiri i vendimmarrjes”, thuhet në reagimin e Nismës Thurje.
Reagimi
Të arrestohet ish ministri Beqaj dhe të sekuestrohet pasuria e vjedhur!
Nisma Thurje përgëzon SPAK-un për arrestimet e sotme. Çdo hap në avancimin me hetimin e kallëzimit të depozituar nga Nisma Thurje në Dhjetor të vitit 2019 është një hap në drejtim të rikthimit të besimit tek drejtësia.
I inkurajojmë prokurorët e SPAK-ut që të mos kufizohen në nivelin e funksionarëve publik, por të çojnë përpara drejtësisë politikanët e lartë duke nisur që nga ish ministri Ilir Beqaj e deri ku arrin zinxhiri i vendimmarrjes.
Gjithashtu presim që paratë që i janë vjedhur shtetit shqiptar të konfiskohen dhe t’u rikthehen shqiptarëve. Vilat që janë ndërtuar me paratë e sterilizimit të kthehen në qendra shëndetësore shtetërore.
Populli shqiptar i ka sytë nga drejtësia e re. Katër vite kanë kaluar që nga denoncimi ynë. Nuk ka më kohë për të humbur.
Discussion about this post