Një 52-vjeçar humbi jetën në Shkodër pasi banesa e tij u përfshi nga flakët. Një prej fqinjëve dëshmoi për gazetarët se zjarrëfikësja erdhi 40 minuta me vonesë pas njoftimit të marrrë. Sipas tij, nëse forcat zjarrëfikëse do të ishin më të shpejta në regim, 52-vjeçari do të ishte ende gjallë.
Një ditë pas ngjarjes që i mori jetën kryefamiljarit në Shkodër, ministri i Brendshëm Taulant Balla ka zhvilluar një takim me drejtuesit e shërbimit zjarrëfikës. Gjatë fjalës së mbajtur, ai është treguar kritik me shërbimin e ofruar dhe ka pranuar problematikat në sistem.
“Në vitin 2023 janë kryer 3,498 inspektime dhe diferenca me masat administrative është shumë e madhe, janë vendosur vetëm 42 masa. Nuk e besoj dot se ka kaq pak shkelje. Shoh dy mundësi, ose inspektimet janë selektive tek subjektet që nuk kanë probleme, ose janë kryer pa analizuar problemet reale”, citohet Balla në një njoftim nga zyra e shtypit pranë Ministrisë së Brendshme. “Nëse nuk bëhet inspektimi në një ndërtesë dhe aty ndodh një fatkeqësi, janë kushtet e shpërdorimit të detyrës”, u shpreh ai.
“Shërbimi zjarrfikës ka nevojë për uniformizim dhe përmirësim më të prekshëm si në Drejtorinë e Përgjithshme, e gjithashtu në nivel vendor”, deklaroi Balla në takimin e mbajtur me drejtuesit e Shërbimit në 61 njësi vendore në Shqipëri.
Ministri tha se duhet plotësuar baza e plotë nënligjore për rekrutimet, trajnimet, menaxhimin e të dhënave, si dhe përmirësimin e transparencës së inspektimeve ndaj bizneseve.
“Jemi të gjithë të mirëkuptuar se gjithçka thashë është një epikrizë jo e plotë e situatës. E di fare mirë që në një pjesë të bashkive nuk kemi flotën e duhur të mjeteve zjarrfikëseve, nuk janë punonjësit e duhur në disa njësi vendore të trajnuar në këtë shërbim, por drejtuesit vendorë duhet të kuptojnë se të punosh në këtë shërbim nuk është qokë, sepse rrezikon edhe vetë jetën e atij personi që është emëruar në atë detyrë që nuk ka njohuri“, tha Balla.
Ai kërkoi ndryshim të menjëhershëm të situatës, referuar të dhënave të ofruara nga inspektimet për këtë vit. “Nuk duhet të ketë asnjë objekt me intenstitet të madh publik si hotel, kinema, etj, pa u inspektuar”, tha Balla, i cili sipas burimeve zyrtare nga MB, në ditët e para të vitit, ka firmosur një urdhër që detyron MZSH-në të kryejnë inspektime në çdo subjekt.
Discussion about this post