Një ditë pasi shkatërroi selinë e PD, dhe dështoi në misionin e tij për të nxjerrë Lulzim Bashën nga zyra e kreut të PD, ish-kryeministri Sali Berisha shkoi sërish në selinë blu.
Kokëulur, duke u munduar të fajësojë Bashën për gabimet e tij, Berisha tha se protesta e tij faktoi se Basha është armik i demokratëve, ndërsa shprehu mirënjohjen për përkrahësit e tij.
“Erdha për të shprehur mirënjohje ndaj heronjve të 8 janarit që si shumicë u faktuan shqiptarëve se Lulzim Brava është sot një armik po aq i egër, një fytyrë mizore për ta. Erdha në emër të atyre që erdhën nga qytete të ndryshme dhe u larguan pasi mbi ta u përdor sasi toksike gazi dhe pavarësisht nga këto, dyert e blinduara nga Lulzim Turpi i hapën. Zotohem se asgjë nuk mund të pengojë konsolidimin e pluralizmit politik në Shqipëri dhe mbizotërimin e shumicës. Dua të shpreh solidaritetin tim dhe mirënjohjen e pakufishme ndaj atyre që u arrestuan me listat e dala nga ai që shqiptarët i thonë Lulëzi, me bashkëpunim të ethshëm me narko policinë e Ramës”, tha Berisha.
Ndër të tjera, Berisha ka hedhur akuza ndaj Bashës se brenda selisë së partisë një ditë më parë ka pasur njerëz të armatosur.
Discussion about this post