Presidenti i Partisë së Lirisë, Ilir Meta, u prangos në mënyrë të dhunshme nga SPAK, që solli si argument edhe një ligj për pasuritë minerare të vendit në këtë dosje.
Sipas SPAK, Meta dhe Monika Kryemadhi, kishin lobuar për një ligj për minierat në vend dhe në këmbim do merrnin një vilë, të cilën në fakt nuk e morën.
Por ligji në fjalë u votua me shumicën e votave të mazhorancës në tetor të vitit 2014.
Madje projektligji, u propozua nga deputetja socialiste Esmeralda Shkjau.
Në votimin e ligjit, kryeministri Edi Rama mburrej duke thënë se po nis një epokë e re.
“Ky projekt, nuk është një projekt i radhës. Është një projekt me rëndësi strategjike që ndan qartë dy epoka; Epokën e një barbarie të stërzgjatur me pasojë tragjedira të njëpasnjëshme të kthyera në rutinë, me shfrytëzimin krejtësisht kriminal të pasurisë kombëtare në zonën e Bulqizës në radhë të parë, por në tërësi në zonat e pasura minerale dhe Epokën që nis me miratimin e këtij projekti, i cili ka në themelin e vet në radhë të parë detyrimin për siguri, pastaj domosdoshmërinë për inovacion, dhe si rezultat edhe garancinë për progres.
Unë dua të falënderoj përpara Kuvendit në radhë të parë ministrin e Energjisë dhe të Industrisë, të gjithë ekipin e tij, për vendosmërinë më të cilën kanë çuar përpara një proces jashtëzakonisht të vështirë duke futur duart në një zgavër gjarpërinjsh. E rezultat revokimi i lejeve minerare për 160 subjekte që nuk përmbushnin detyrimet kontraktuale ndaj shtetit si një provë e vendosmërisë, por edhe e vështirësisë së këtij procesi.
Por duhet të falënderoj edhe të gjithë përfaqësuesit e ‘Aleancës për Shqipërinë Europiane’ në këtë Kuvend që vijnë si përfaqësues të popullit të këtyre zonave dhe posaçërisht të zonave të veriut, për mbështetjen dhe kontributet që kanë sjellë për ta përcaktuar qartë dhe në mënyrë të konsoliduar kornizën e këtij projekti,” shprehej Rama në Kuvend më 9 tetor të vitit 2014.
Discussion about this post