Nga Etleva Merko
Qeveria” nuk pati kohë të përgatitej për sezonin turistik pasi ishte e zënë me përdorimin e pushtetit për zgjedhjet. Menjëherë pas votimeve, kryeministri, me stilin e tij të zakonshëm teatral, doli dhe foli për “ndryshim” dhe për “shërbim më të mirë për qytetarët”, duke kërkuar të sjellë njerëz të rinj në poste të vjetra, sikur problemi ishte tek emrat dhe jo te sistemi që ai vetë ka ndërtuar.
Foli me të madhe për lirimin e hapësirave publike sikur këto hapësira nuk kanë qenë të zaptuara me bekimin e tij dhe për shkarkime drejtorësh, sikur papritmas i ra ndër mend të bëjë shtet. Por ajo që harroi të përmendë ishte pikërisht thelbi: mungesa totale e përgatitjes për sezonin turistik, për rendin publik, për mbrojtjen nga zjarret, për shërbimet bazë që një shtet serioz duhet të garantojë në kulmin e verës.
Në vend të shtetit ligjor, kemi “investime strategjike” të kamufluara me emra modernë, por që në realitet nuk u shërbejnë qytetarëve, mjafton të shohim Palasën, Manastirin apo edhe vetë Tiranën për të kuptuar se e gjitha kjo ka sjellë betonizim,uzurpim dhe mungesë transparence.
Kryeministri nuk del as të sensibilizojë, as të qartësojë planin e masave për këtë situatë. Përkundrazi, çdo ditë del në ekran, bullizon, etiketon, dhe me arrogancë shet broçkulla për reformë dhe ligj.
Një teatër i shëmtuar që nuk e blen më askush përveç atyre që kanë vendin e sigurt në lozhën e privilegjeve.
Rama s’po ndërton shtet, por një skenë ku gjithçka është shfaqje: shumë zhurmë, shumë fjalë, pak vepra.
Discussion about this post