Avokati i popullit ka reaguar në lidhje me ngjarjen e tmerrshme që ka ndodhur mbrëmë në Kamëz kur nga flakët që përfshinë komisariatin vdiq një 26-vje, u asfiksua një efektiv policie dhe u lënduan disa të tjerë. Përmes një deklarate publike Avokati i popullit ka bërë thirrje për përmirësim të kushteve të paraburgimit, duke theksuar se nuk i afrohemi direktivave europiane dhe kjo vë në rrezik jetën e shumë personave.
“Nisur nga kjo ngjarje Avokati i Popullit, për herë të disatë sjell në vëmendje të autoriteteve nevojën e marrjes së masave të menjëhershme dhe energjike për përmirësimin e kushteve pranë njësive policore në përputhje me angazhimet e shtetit shqiptar pranë organizmave ndërkombëtare si dhe në zbatim të akteve ligjore kombëtare e ndërkombëtare”, thuhet në deklaratë.
Sakaq, ky institucion shprehet se qeveria po anashkalon kushtet e papërshtatshme në komisariatet tona, pasi në rekomandimin më të fundit të Avokatit të Popullit për Komisariatin nr. 5 të Policisë së Tiranës, i dërguar në qershor 2021, i është mëshuar pikërisht nevojës për plotësimin e kushteve normale në këto ambiente, për parandalimin e ngjarjeve analoge me këtë të mbrëmjes së sotme, e cila fatkeqësisht në këtë rast rezultoi fatale. Prandaj Avokati i Popullit bën përgjegjëse qeverinë dhe institucionet e tjera në kompetenca për këtë tragjedi.
Më tutje Avokati i Popullit thotë se ka rekomanduar masa mbi ndërtimin e ambienteve të sigurisë, mjediseve të veçanta për të miturit, pajisjen me orendi bazë, pajisjen me sistem ngrohjeje për stinën e ftohtë, pajisjen me sistemin e sinjalizimit me zile për raste emergjente, pajisjen me sistemin e monitorimit me kamera, si dhe kushte të tjera.
Discussion about this post