Urgjenca në qendrën spitalore Nënë Tereza nuk i është kthyer ende normalitetit, pas përfshirjes nga zjarri disa ditë më parë.
Sipas informacioneve, nuk ka ende asnjë përgjigje se kur mund të rifillojë të funksionojë normalisht shërbimi i urgjencës në qendrën më të madhe spitalore në vend.
Sot ishte afati i fundit që ministrja e Shëndetësië, Albana Koçiu kishte lënë për të sqaruar atë çfarë ndodhi në urgjencën e spitalit qendror në Qsut, shkakun, vlerësim të dëmit.
Lidhur me këtë situatë ka reaguar edhe kryetarja e Komisionit Parlamentar për Shëndetësinë, Zhani Gjergji, e cila ka kërkuar që të zbardhet shkaku i zjarrit tek Urgjenca e QSUT-së.
Ajo tha se godina e Urgjencës në QSUT është ndërtuar vetëm një vit më parë dhe ka kushtuar plot 17 milionë euro.
“Qytetarë të shumtë në emergjencë shëndetësore janë përballur me dyert e mbyllura të Urgjencës së QSUT-së dhe iu është dashur t’iu drejtohen spitaleve të tjera të kryeqytetit, vonesë që ka rezultuar edhe fatale për pacientë në gjendje të rëndë shëndetësore. Kjo vetëm si rezultat i papërgjegjshmërisë dhe arrogancës së drejtuesve të QSUT-së dhe Ministrisë së Shëndetësisë. Prandaj, në emër të Grupit Parlamentar të PD-së dhe Komisionit Parlamentar për Shëndetësinë kërkoj me urgjencë zbardhjen e shkaqeve të zjarrit në QSUT dhe përgjegjësve, si dhe marrjen e masave për ofrimin e shërbimeve jetëshpëtuese për qytetarët. E gjitha kjo ka ndodhur për shkak të arrogancës dhe pa aftësisë”, tha Gjergji ndër të tjera.
Discussion about this post