Lumi Seine në Paris po dështon në testet e cilësisë së ujit një muaj përpara Lojërave Olimpike që do zhvillohen në kryeqytetin francez.
Ky lumë është planifikuar të presë garën e notit në ujëra të hapur.
Testet e fundit, të përfunduara javën e kaluar dhe të publikuara nga zyra e kryebashkiakut të Parisit, treguan se nivelet e baktereve E Coli – një tregues i materies fekale – janë shumë mbi kufijtë e vendosur nga federatat sportive.
Më 18 qershor, niveli i E Coli ishte 10 herë mbi nivelet e pranueshme dhe në asnjë moment nuk ra nën kufirin e lejuar.
“Cilësia e ujit mbetet e degraduar për shkak të kushteve të pafavorshme hidrologjike, diellit të pakët, temperaturave sezonale nën mesatare dhe ndotjes në rrjedhën e sipërme,” tha zyra e kryetarit në një deklaratë.
Autoritetet franceze kanë shpenzuar 1.4 miliardë euro në dekadën e fundit duke u përpjekur të pastrojnë lumin duke përmirësuar sistemin e kanalizimeve të Parisit, si dhe duke ndërtuar objekte të reja për trajtimin dhe ruajtjen e ujit.
Por stuhitë e mëdha ende pushtojnë rrjetin e ujërave të zeza të kryeqytetit, disa prej të cilave datojnë në shekullin e 19-të, duke çuar në derdhjet e ujërave të zeza të patrajtuara drejtpërdrejt në lumë.
Discussion about this post