Që nga prilli i vitit 2021, kur u inaugurua, Spitali Memorial Fier është kthyer në një nga gropat thithëse për buxhetin e Shëndetësisë. Fryhen fondet limit dhe shpërdorohen në tendera fiktivë. Kjo ndodh edhe me akomodimin e mjekëve turq.
Këtë trend e krijoi ish-ministrja e Shëndetësisë, Ogerta Manastirliu dhe po e vazhdon pasaardhësja e saj Albana Koçiu, sigurisht duke përdorur drejtoreshën e spitalit Rudina Degjoni.
Këtë herë Degjoni ka zhvilluar kontratën me vlerë 325 milionë lekë dhe objekt ‘Shërbim hoteleri akomodim për personelin’. Bëhet fjalë për personelin turk.
Në dokumentet e tenderi thuhet se do të akomodohen 40 mjekë për 225 net (rreth 8 muaj) deri në tenderin tjetër.
Por, Degjoni është kujdesur që mjekët të flenë në dhoma të rehatshme, ku jastëkët duhet të jenë të cilësisë se lartë dhe bashkëkohor, madje duhet patur kujdes që çdo dhomë të ketë mëngjesin e përfshirë, televizor dhe kondicioner të cilësisë së lart dhe bashkëkohor. Sikur Degjoni dhe Koçiu të kishin këtë shqetësim edhe për pacientët.
Gjithsesi me këto kërkesë atë larta dhe me një fond të fryrë, Dogjani e ka dhënë këtë tender pa garë. Për 20 ditë që është lënë hapur gara ka dorëzuar ofertë vetëm nga pronari i MONDIAL BOUTIQUE HOTEL, i regjistruar si person fizik. Degjoni nuk është marrë fare me përmbajtjen e aplikimit, menjëherë ajo e ka shpallur fitues Shahun dhe më datë 29 korrik kanë bërë publike kontratën.
Po sa kushton një natë në këtë hotel që ndodhet në Mbrostar të Fierit?
Në reklamat që publikon vetë hoteli, dhomat kushtojnë 52 euro përfshirë mëngjesin.
Ndërsa paratë që përfiton Haxhi Shahu janë për 255 net për 40 persona (maksimale) që do të thotë 1026 në total. Mesatarisht, një natë e mjekut turk në këtë hotel kushtoka 320 Euro. Në të gjithë Fierin çmimi mesatar i hoteleve të regjistruara në booking.com është 50 euro. Ku e gjeti këtë çmim marramendës drejtoresha dhe ministrja? Çfarë tenderi është ky? Si është llogaritur fondi limit?
Ky prokurim është vlerësuar nga Open Data Albania me ‘Flamurin e Kuq’ për shkelje të ligjit dhe zhvillim pa garë. Shpjegojmë se “Flamuri” është shenja që tregon riskun e korrupsionit.
Degjoni nuk e ka për herë të parë që firmos tendera pa garë e sidomos për “netët luksoze” të mjekëve turq. Ky është i treti vit që paratë e tenderit i jepen Shahut.
Në qershor 2022, biznesmeni Shahu fitoi prokurimin me objekt tenderin me objekt “SHËRBIM I AKOMODIMIT TË PERSONELIT TURK” dhe me vlerë 322 milionë lekë. Ndërsa më herët, në maj kishte fituar tenderin 50 milionë lekë sërish për të njëjtin objekt.
Kështu vitin 2022 e mbylli me përfitimin e 372 milionë lekëve pa garë nga Spitali Memorial Fier.
Ndërkaq në vitin 2023, hoteli Mondial në Mbrostar e rriti ‘piacën’. Degjoni zhvilloi tenderin me vlerë 1.2 milionë euro për “dhomat luksoze” të mjekëve turq. Kaq para nuk i harxhon as kabineti i Erdoganit!
Degjoni është emër i lakuar në prokurori për korrupsion. Prokuroria dërgoi në gjyq drejtoreshën e Spitalit Memorial të Fierit, Rudina Degjonin nën akuzën e shpërdorimit të detyrës. Prokuroria arriti në këtë konkluzion pasi përfundoi hetimet për Degjonin e cila në kundërshtim me ligjin kishte lejuar të kryhen procedurat e botoksit të stomakut te pacientët, por me preparate mjekësore që nuk ishin blerë nga spitali.
Me sa duket drejtoresha ia ka hedhur paq dhe vazhdon abuzimet me tenderat.
Discussion about this post