Tirana do të përballet këtë të shtunë më skuadrën e Egnatias në orën 13:45 në ‘Arena Egnatia’ për javën e 11 të Superligës.
Gjatë konferencës për shtyp të dhënë në prag të kësaj sfide trajneri i kryeqytetasve, Orges Shehi, është shprehur se ekipi i Rrogozhinës ka shumë cilësi dhe duhet treguar kujdes ndaj tyre.
“Përballemi me një skuadër që ka elementë cilësor brenda saj. Skuadër që ka vendosur në vështirësi çdo ekip, dhe po ta shihni ka shumë pak humbje, ecuri pozitive. Ndërrimi i trajnerit neve na bën konfuz sepse nuk e dimë sesi ata do të vendosen. Jemi të ndërgjegjshëm që na pret një ndeshje e vështirë”.-tha Shehi.
Më tej duke folur për dëmtimet tekniku i ‘Bardhebluve’ theksoi se do të kenë mungesa të rëndësishme edhe në këtë sfidë, siç është ajo e Redon Xhixhës, i cili është edhe një nga golashënuesit që ka realizuar më shumë me Tiranën.
“Kemi mungesën e Xhixhës dhe të Përgjonit që na penalizon, është rikthyer Behiratchee. Grupi është i plotë, skuadrën e kam parë gjatë gjithë javës të mobilizuar për të bërë kthesën dhe për t’u rikthyer te fitorja. Nuk mendoj vetëm diferencën me Kukësin, shumë skuadra të tjera kanë rikuperuar pikë dhe janë pranë”.-tha ndër të tjera Orges Shehi.
Aktualisht Tirana qëndron në krye të tabelës së Superligës, megjithatë diferencë me Kukësin e vendit të dytë është vetëm një pikë./K.T/Gijotina.com
Discussion about this post