Një ngjarje tragjike ka ndodhur rreth orës 13:30 të ditës së sotme në Tiranë, ku dyshohet se një person ka kryer vetëvrasje brenda ambienteve të një poligoni qitjeje.
Policia e Tiranës konfirmoi ngjarjen me një njoftim paraprak, duke deklaruar se: Viktima është shtetasi B. H., 35 vjeç. Ngjarja ka ndodhur brenda një poligoni në rrugën “Dervish Hima”, në afërsi të stadiumit “Air Albania”. Dyshohet se shtetasi B. H. ka kryer vetëvrasje me armën e zjarrit me të cilën po kryente qitje.
Shërbimet e Policisë dhe grupi hetimor ndodhen në vendngjarje dhe po punojnë për sqarimin e plotë të rrethanave dhe dokumentimin ligjor të rastit.
Nga burimet u bë i mundur identifikimi i viktimës si Bledi Hasani. Hasani raportohet se ka qenë klient i poligonit të qitjes, por gjatë qitjes ka kthyer armën nga vetja. Ende nuk ka detaje të qarta mbi rrethanat specifike që çuan në këtë akt tragjik, as mbi arsyet apo motivet që e shtynë 35-vjeçarin drejt vetëvrasjes.
Hetimet do të vazhdojnë me marrjen në pyetje të dëshmitarëve dhe analiza të tjera për të zbardhur plotësisht dinamikën e ngjarjes brenda poligonit.
Discussion about this post