Në muajin korrik Ilir Metës i përfundon mandati si president dhe në vend janë gati të nisin negociatat për emrin e ri që do të zërë vendin e tij. Ndërkohë, ditët e fundit qarkullojnë lajme se ka shanse që presidenti i ri të jetë një personazh nga Kosova. Lidhur me ketë çështje ka folur Mentor Nazarko, i cili shprehet se zgjedhja e dikujt nga Kosova president në Tiranë është pothuajse e pamundur edhe pse ky lajm po qarkullon gjithmonë e më shumë. Nazarko tregoi se nga ana ligjore ekziston një pengesë e madhe. “Çdokush në Prishtinë që mund të ëndërrojë të bëhet president i Shqipërisë, duhet të ketë lindur atje, përveçse të jetë shtetas shqiptar. Përndryshe, shkelet Kushtetuta”, tha ai.
Nga ana tjetër, Nazarko thotë se kjo që po flitet merr shkas pasi në Shqipëri ka pasur dy ministra kosovarë, ndonëse akti më i lartë juridik paraqitet si pengesë e pakalueshme. “Sigurisht lidhet me faktin që Qeveria Rama ia ka lejuar vetes që të vendos dy ministra nga Kosova dhe në këtë kuptim, ideja e një presidenti të Shqipërisë që vjen nga Kosova duket gjithmonë e më reale”, tha ai. Por shton se “ka një pengesë, që është kushtetuese, sepse presidenti duhet të jetë shtetas shqiptar nga lindja”, tha ai. Gjithsesi mbetet të shohim nëse do të ketë kandidatë nga Kosova.
Discussion about this post